44% më pak të huaj gjatë nëntorit – Largohen vizitorët nga Kosova, afrohen ata nga Maqedonia e Veriut
Numri i shtetasve të huaj që ka hyrë në Shqipëri gjatë muajit nëntor ka rënë me rreth 44%, tregojnë të dhënat më të fundit nga instituti i statistikave, Për të gjithë 11-mujorin e këtij viti ndërkohë, rënia fiksohet në masën 59.5%, çka ilustron mjaft mirë efektin e pandemisë jo vetëm në transport dhe turizëm, por në të gjithë zinxhirin e ekonomisë.
Edhe sa i përket hyrjes së shtetasve shqiptarë, të cilët në shumicën e rasteve janë emigrantët, rënia është e ndjeshme, në masën 50% si për nëntorin, ashtu edhe për 11-mujorin, sinjalizojnë të dhënat nga instituti i statistikave. Rënia e numrit të vizitave nga emigrantët në vendin tonë përkthehet gjithashtu në më pak remitanca, veç efektit të drejtpërdrejtë në ekonomi. Edhe gjatë tetorit, shifrat e rënies ishin të ngjashme, me përjashtim të hyrjes së shtetasve shqiptarë, ku rënia ishte disi më e vogël se nëntori.
Ajo që bie tjetër në sy nga shifrat është fakti se numri i shtetasve nga Kosova që kanë hyrë në Shqipëri i është rikthyer rënies gjatë nëntorit, ndryshe nga muaji tetor, kur rritja ishte në 35%. Për të gjithë 11-mujorin, numri i shtetasve nga Kosova që ka vizituar Shqipërinë, regjistrohet në rënie prej 40%. Gjatë nëntorit, vetëm hyrjes e shtetasve të huaj nga Maqedonia e Veriut regjistrohen në rritje, në masën 29.1%. Edhe sa i përket daljeve të shtetasve shqiptarë, shifrat janë thuajse të përgjysmuara. Gjatë nëntorit, rënia fiksohet në 56.6%, ndërkohë që për 11-mujorin në 50.5%.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.