4740 vende të lira pune – Bizneset kërkojnë më së shumti punëtorë krahu

Rreth 48.374 punëdhënës janë regjistruar në faqen zyrtare të Shërbimit Kombëtar të Punësimit, ku dhe kanë publikuar vendet e lira të punës në kompanitë e tyre, ndërkohë që në total janë rreth 4740 vende pune vakante. Ajo që vihet re, është se bizneset kërkojnë më së shumti punëtorë krahu me, një pozicion që në fakt nuk kërkon as kurse profesionale.

Paradoksi është që ndërkohë që ka shumë vende të lira në këtë pozicion,  shumë punëtorë krahu e kalojnë ditën në zona të ndryshme të kryeqytetit, por jo vetëm,  në pritje për t’u punësuar apo për të bërë punë sipas nevojave që mund të kenë qytetarë të ndryshëm.  Nga lista e vendeve vakante të publikuara on line vihet re gjithashtu se ka kërkesë të lartë për zanate, si rrobaqepës, prestart, fadromistë, xhenerikë, vinçierë, saldatorë, këpucarë, shoferë, hidraulikë, marangoz etj.

Megjithatë në listën e vendeve të lira të punës e gjejnë veten edhe punëkërkues me profesione që kërkojnë arsim të lartë, si inxhinierë, ekonomistë, specialistë të rrjeteve kompjuterike, bankierë, programues, etj. Vendet e punës janë të shpërndara në të gjithë Shqipërinë.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.