493.4 milion lekë për trajtimin në spitalet COVID – Të dhënat e MSH/ Gjatë 2020-ës buxheti financoi dhe paketat në spitalet publike e private
Trajtimi i pacientëve në spitalet COVID i ka kushtuar buxhetit të shtetit 493.4 mln lekë përgjatë vitit 2020. Sipas të dhënave zyrtare nga Ministria e Shëndetësisë dhe Sociale, në total për këtë zë buxhetor ishin parashikuar 500 mln lekë, çka tregon se plani është realizuar në masën 98.68%. Ndërkaq, sa i takon shpenzimeve të tjera të kujdesit shëndetësor dytësor, që zënë 38.09% të totalit të shpenzimeve të kësaj ministrie, rezulton se gjatë vitit pandemik, qeveria ka vazhduar të financojë paketat e kardiologjisë, kardiokirurgjisë apo dializës në spitalet publike e private.
Për paketat e kardiologjisë dhe kardiokirurgjisë në total buxheti i shtetit shpenzoi rreth 1.44 mld lekë. Ndërkohë që, sipas ministrisë, për shkak të situatës së krijuar nga pandemia, disa nga ndërhyrjet e planifikuara në spitalet publike nuk u realizuan, kështë që realizimi i paketave gjatë vitit 2020 nuk është në nivelin e pritshëm. Në total u realizuar 6,197 raste të paketave të kardiologjisë e kardiokirurgjisë, ndërsa paralelisht janë kryer dhe 10 raste të paketës së transplanit të veshkës, me një kosto totale prej 15.78 mln lekë.
Gjithashtu, u realizuan gjithsej 195,384 seanca dialize, në spitalet publike, jopublike si dhe sipas kontratës koncesionare në pesë spitale rajonale të vendit, me një kosot totale prej rreth 2.278 mld lekë. Ndërkaq, sipas Ministrisë së Shëndetësisë, situata e krijuar nga pandemia ka sjellë nevojën e rishikimit të treguesve sasiorë të performancës në disa nga shërbimet në programin e shërbimit spitalor.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.