497 shërbime online në e-Albania – Gjokuta: Jemi në shërbim të qytetarëve!

Aktualisht qeveria shqiptare është duke zbatuar një nga reformat më të rëndësishme në ofrimin e shërbimeve publike ndaj për momentin 497 shërbime po ofrohen online nga institucionet e Ministrisë së Financave dhe Ekonomisë përmes platformës e-Albania.

Sipas njoftimit për të garantuar zbatimin e plotë dhe për të siguruar mbarëvajtjen e ofrimit të shërbimeve, me mbylljen edhe të sporteleve fizike, Sekretari i Përgjithshëm i Ministrisë së Financave dhe Ekonomisë Arlind Gjokuta së bashku me drejtorin e Departamentit të Miradministrimit në Kryeministri Dritan Palnikaj dhe drejtori i Përgjithshëm i Institutit të Sigurimeve Shoqërore Astrit Hado inspektuan drejtoritë rajonale të Sigurimeve Shoqërore Fier dhe Vlorë.

Në informacionin e publikuar theksohet se gjatë inspektimit u kërkua angazhimi i të gjitha strukturave për të bërë të mundur që në asnjë moment të mos ndërpritet ofrimi i shërbimeve për qytetarët dhe biznesin, me qëllim marrjen e informacionit dhe ndihmën e duhur për të plotësuar nevojat e tyre, përmes rrugëve alternative të komunikimit.

“Do të vijojmë të jemi në krah të qytetarëve, duke ju kursyer kohë dhe kosto për shumë shërbime që tashmë mund të merren nga kudo me një klikim”, u shpreh Gjokuta.

E . S / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.