5 presidentë do të marrin pjesë në Samitin Ekonomik në Stamboll, mes tyre dhe Bujar Nishani

40 Shtete dhe pesë presidentë do të marrin pjesë në Samitin e 20-të Ekonomik Euroaziatik, organizuar nga Fondacioni i Grupit Marmara. Tema e sivjetshme e samitit që do të mbahet në data 4 dhe 6 prill në Stamboll është “Njerëzimi në udhëkryq”.

Presidenti i Shqipërisë Bujar Nishani, ai i Malit të Zi Filip Vujanovic, presidenti boshnjak Mladen Ivanic, ai maqedonas Gjorge Ivanov dhe presidenti i Qipros turke Mustafa Akinci pritet të marrin pjesë në këtë takim.

“Këtë vit do të trajtojmë të ardhmen e Bashkimit Europian në Samitin e 20-të Ekonomik Euroaziatik, i cili do të presë presidentët e Shqipërisë, Maqedonisë, Malit të Zi, Bosnje-Hercegovinës dhe Qipros Turke”, u shpreh presidenti i Marmara Group Foundation, Akkan Suver.

Suver tha se bota është përballur me një tërmet politik që ka goditur çdo shoqëri dhe shtet në botë.

Ashtu si në samitin ekonomik të Delosit, edhe në Stamboll duket se tema kryesore do të jetë populizmi dhe ksenofobia në rritje.

“Do të përpiqemi të marrim përgjigje nga politikanët, akademikët dhe liderët e shoqërisë civile të vendeve të ndryshme”, u shpreh Akkan Suver.

Edhe Kosova së bashku me Azerbajxhanin, Afganistanin, Bosnje-Hercegovinën, Marokun dhe Rumaninë do të marrin pjesë në nivel ministrash.

Në samit do të jenë të pranishëm edhe përfaqësues të Parlamentit Europian, Kombeve të Bashkuara, Organizatës për Bashkëpunim Islamik, Bankës Europiane për Rindërtim dhe Zhvillim, si dhe Forumit Ekonomik të Vjenës.

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.