518 zyrtarë të dyshuar për pastrim parash – Raporti i ILDKPKI: Nën hetime deputetë e krerë bashkish, 16 nëpunës të lartë në prokurori
Inspektorati i Lartë i Deklarimit të Pasurive bën me dije se në total ka raportuar në Drejtorinë e Përgjithshme të Parandalimit të Pastrimit të parave 518 zyrtarë. E dhëna zbardhet në raportin vjetor të punës të institucionit që kontrollon deklaratat e pasurive dhe konfliktet e interesave të zyrtarëve të lartë.
Inspektorati raporton se ka ushtruar kontroll të thelluar për për 802 subjekte deklaruese gjatë vitit të shkuar, ndërkohë që numri total i deklaratave të administruara prej saj është 4,032. “ Inspektorati i Lartë, gjatë periudhës 2014 – 2021, ka referuar pranë Institucionit të Prokurorisë, strukturave të hetimit tatimor, Drejtorisë së Përgjithshme të Parandalimit të Pastrimit të Parave, si dhe Policisë së Shtetit, 518 subjekte, në të cilët janë përfshirë zyrtarë të nivelit të lartë drejtues, si Deputetë të Kuvendit të Republikës së Shqipërisë, Kryetarë Bashkie, Drejtorë Drejtorie etj., thekson në raport ILDKPKI.
Nga raporti mësohet se institucioni ka ndërmarrë gjatë vitit të shkuar ndëshkimin e subjekteve deklarues të gjetur në shkelje të kuadrit ligjor, duke aplikuar 130 masa administrative “gjobë” dhe depozituar 16 referime penale dhe referime të tjera pranë institucionit të Prokurorisë, strukturave të hetimit tatimor, si dhe strukturave të Policisë së Shtetit.
Edhe për vitin 2021, pak rezultate ka siguruar programi i sinjalizuesve, i cili nxit nëpunësit e administratës të raportojnë rastet e korrupsionit. Inspektorati i Lartë bën me dije se ka regjistruar dhe trajtuar në total 11 raste sinjalizimi dhe 1 kërkesë për mbrojtje nga hakmarrja, të ardhur nga sektori publik. Në analizim të rasteve të paraqitura, rezulton se 10 raste sinjalizimi të jashtëm kanë ardhur nga sektori publik dhe 1 rast i përket sektorit privat.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.