583 ndërtime nuk legalizohen – ALUIZNI: Janë përjashtuar me kërkesë të Inspektoriateve të Territorit
Ndërsa viti 2018 ka shënuar progres të ritmeve të legalizimit, janë evidentuar në total 583 objekte të cilat janë përjashtuar nga procesi. Në raportin e vet ALUIZNI vëren se kërkesa për përjashtim nga procesi ka ardhur nga Inspektoratet vendor të Mbikëqyrjes së Territorit.
“Krahas procedurave të legalizimit, nga drejtoritë e varësisë të ALUIZNI-t gjatë kësaj periudhe janë kryer edhe procedurat administrative të përjashtimit nga procesi i legalizimit, për 583 ndërtime, të cilët nuk plotësojnë kushtet për legalizim, sipas ligjit nr.9482/2006 “Për legalizimin…” dhe VKM nr. 280/2014. Kryesisht iniciativa për përjashtim nga Iegalizimi është marrë mbi bazën e kërkesave të IMT-Vendore pranë Bashkive dhe Inspektoratit Kombëtar të Mbrojtjes së Territorit, në kuadër të zbatimit të projekteve të infrastrukturës publike”, thekson në raport ALUIZNI.
Sa për procesin e legalizimit të ndërtimeve pa leje, ALUIZNI raporton se është ecur me ritme të shpejta, me një mesatare prej rreth 2,500 legalizimesh në muaj. Në total janë miratuar 30,151 leje legalizimi, duke e realizuar me 120% objektivin fillestar prej 250 mijë lejesh.
Ndërkaq, ALUIZNI raporton se gjatë vitit të shkuar ka grumbulluar rreth 13 milionë dollarë nga kalimi i së drejtës së pronësisë së parcelave ndërtimore të objekteve pa leje. I tërë ky fond ka kaluar në buxhetin e shtetit në funksion të kompensimeve të pronarëve të prekur nga ndërtimet pa leje.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.