6.3 milionë euro për reformën e ujit, BE: Qeveria dhe pushteti vendor mbajnë kostot e dështimit
6.3 milion euro do të jepen për “vënien në shina” të sektorit të ujit në Shqipëri nga Bashkimi Europian, qeveria gjermane dhe ajo austriake.
Si një sektor mjaft problematik, me infrastrukturë të amortizuar dhe mungesë investimesh, program i mbështetjes nga BE synon që të rrisë cilësinë e furnizimit me ujë të pijshëm, të menaxhojë burimet ujore dhe të rrisë nivelin e trajtimit të ujërave të ndotura, i cili është një proces që aktualisht realizohet në masën vetëm 10 për qind.
Megjithatë, përgjegjësia kryesore i takon qeverisë qendrore dhe lokale, për suksesin e kësaj reforme.
“Të bashkojmë forcat për të ndihmuar vendin që të çojë përpara reformën në sektorin e ujit. Përforcimi i manaxhimit të ujit dhe përdorimit të tij është afatgjatë. Ne kemi punuar për forcimin institucional dhe zbatimin e legjislacionit. Si në shumë reformat ë tjera, nëse punojmë vetëm në nivelin e Tiranës, do të dështojmë, duhet të zgjerohemi në çdo bashki. Ne jemi këtu të angazhuar për të bërë ndryshime në sektorin e ujit, por përgjegjësia kryesore u takon institucioneve shtetërore, sidomos atyre të sapo krijuara. Shikojeni me përparësi, ndryshe përpjekja do shkojë dëm. Duke iu afruar standardeve dhe rregullave të BE do t’ju ndihmojmë që sektori të jetë më efikas dhe i qëndrueshëm. Është shumë e rëndësishme, ne nuk kemi të drejtë të dështojmë dhe nuk do të dështojmë”, deklaroi Mario Mariani, Përfaqësues i BE në Shqipëri.
“Me fondet e Gjermanisë, infrastruktura e ujit është përmirësuar në 40 qytetet dhe 70 fshatra, duke përmirësuar jetën e 1 milionë banorëve. BE ka vendosur të bashkojë forcat me palën gjermane që ta ndihmojë këtë ndërhyrje në këtë sektor. Qeveria shqiptare e drejton këtë përpjekje, ne japim thjeshtë ndihmesën tone”, u shpreh ambasadorja e Gjermanisë në Shqipëri, Susanne Schutz.
“Duhet bashkëpunim midis qeverisë qendrore dhe asaj vendore që ky projekt të ketë sukses. Menaxhimi i burimeve ujore është shumë i rëndësishëm për vendin dhe duhet të ketë vëmendje maksimale”, Martin Ledolter, Drejtor i Agjencisë Austriake të Zhvillimit.
Përfaqësuesit e qeverisë shprehen se për realizimin me sukses të reformës së ujit, përgjegjës kryesore ka pushteti vendor.
Sektori i furnizimit me ujë dhe menaxhimit të ujërave të ndotura është ndër më problematikët në vend dhe ndër vite situata ka vijuar të jetë e njëjtë.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.