6 kritere për rihapjen e shkollave, Raporti/ Garantoni financim, higjienë dhe arsim në distancë

Përpara një vendimi për rihapjen e shkollave në vend, duhet të merren parasysh gjashtë kritere kyçe për të vlerësuar gjendjen e tyre të gatishmërisë dhe për të ndihmuar me planifikimin. Në këtë konkluzion del raporti me temë “Korniza për rihapjen e shkollave” i përgatitur një një sërë aktorësh si Banka Botërore, Unicef, Organizata e Kombeve të Bashkuara për Arsimin, etj. Sipas raportit, elementët kyç që duhen analizuar janë politikat, financimi, funksionimi i sigurt, të nxënit, arritja deri te fëmijët më të margjinalizuar dhe mirëqenia/mbrojtja.

Dokumenti sugjeron se përpara rihapjes së shkollave, duhen përgatitur procedurat dhe planet kryesore të financimit që nevojiten për përmirësimin e të mësuarit, duke i kushtuar vëmendje funksionimit të sigurt, duke përfshirë përmirësimin e praktikave të mësimit në distancë. Ndërsa, si pjesë e procesit të  rihapjes duhet të ndiqet një qasje proaktive për të integruar sërish fëmijët e margjinalizuar dhe ata që nuk ndjekin shkollën.

Sugjerohet investim në furnizimin me ujë, kanalizimet dhe higjienën për të zbutur rreziqet dhe arsimin kompensues për të plotësuar kohën mësimore të humbur. Ndërsa për shkollat e rihapura kërkohet monitorim në mënyrë aktive i treguesve shëndetësorë, duke i kushtuar vëmendje mirëqenies dhe mbrojtjes. Raporti thekson se duhet përmirësuar pedagogjia,  të përshtatet arsimi në distancë, për të kombinuar mësimdhënien me të nxënit, duke përfshirë njohuritë mbi përhapjen dhe parandalimin e infektimit.

Elisabeta Dosku / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.