6 milionë dollarë Kadastrës për të regjistrin e pasurive – Digjitalizimi i të dhënave për 3.8 milionë pasuri, janë përditësuar rreth 800 mijë
Afërisht 6 milionë dollarë janë akorduar nga Këshilli i Ministrave në favor të Agjencisë Shqiptare të Kadastrës me qëllim vijimin e programit digjitalizimit të regjistrit të të dhënave të pasurive të paluajtshme. Vendimi është miratuar në mbledhjen e kësaj jave të Qeverisë dhe parashikon shtimin e fondit prej 652 milionë lekësh, i akorduar nga fondi rezervë i buxhetit, në formën e transfertës në artikullin 604, për Agjencinë Shtetërore të Kadastrës, me qëllim mbulimin e shpenzimeve për projektin “Digjitalizimi i të dhënave kadastrale të pasurive të paluajtshme”.
Programi është përshpejtuar gjatë viteve të fundit, duke sjellë digjitalizimin e të dhënave për rreth 800 mijë pasuri nga viti 2016, por është larg përfundimit të tij. Sipas të dhënave zyrtare të Agjencisë Shtetërore të Kadastrës, në vitin 2020 janë 301 mijë kartela pasurish të digjitalizuara, në vitin 2019 mbi 201 mijë, 167 mijë në 2018, 85 mijë në vitin 2017 dhe rreth 25 mijë në 2016.
Ndërkohë që volumi i të kartelave hipotekore në pritje të digjitalizimit është shumë i lartë. Sipas të dhënave zyrtare të Agjencisë Shtetërore të Kadastrës, në total numërohen rreth 3.8 milion pasuri të regjistruara në rang vendi, dy të tretat e të cilave kanë rezultuar me probleme, ndërkohë që shumë i lartë është edhe numri I pasurive të paregjistruara.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.