60 % e shqiptarëve pa sigurime – Anketa/Nuk kanë asnjë formë të sigurimit shëndetësor

Më shumë se gjysma e qytetarëve shqiptarë nuk kanë asnjë formë të sigurimit shëndetësor. Sipas anketës së bërë nga INSTAT dhe ISHP, konkretisht  62% e femrave dhe 64% e meshkujve raportojnë se nuk kanë asnjë lloj sigurim shëndetësor.

Shifra është tejet e lartë, dhe tregon informalitetin në tregun e punës dhe kontributin e ulët në skemë. Raporti evidenton se sistemi i kujdesit shëndetësor në Shqipëri është kryesisht publik dhe praktika private është e kufizuar.

Në mesin e grave 15-49 vjeç, 32% janë të mbuluara nga sigurimi shëndetësor shtetëror dhe 14 % janë të mbuluara nga programi i sigurimeve shoqërore. Mes meshkujve të njëjtën moshë mbulimi është më i ulët, konkretisht: 29% mbulohen nga fondet shtetërore dhe 9% nga programi i sigurimeve shoqërore.

Ekzistojnë dallime të mëdha gjeografike në mbulimin me sigurime shëndetësore midis meshkujve dhe femrave. Kështu, vetëm 13% e burrave dhe grave në prefekturën e Kukësit mbulohen nga sigurimet shëndetësore shtetërore ose nga kontributet shoqërore e shëndetësore ndërsa në Tiranë 68% e grave dhe 50% e meshkujve gëzojnë mbulim të tillë shëndetësor.

Sigurimi shëndetësor i sponsorizuar nga shteti përcaktohet fuqishëm nga arsimi dhe të ardhurat. Vetëm 17% e meshkujve dhe femrave me arsim fillor 4 vjeçar ose më pak, janë të siguruar, krahasuar me 84% të grave dhe 69% të meshkujve me universitet ose arsim pasuniversitar.

Por pavarësisht mungesës së sigurimit, Fond i Sigurimit të Detyrueshëm i Kujdesit Shëndetësor mbulon me shërbim edhe individët që nuk kontribuojnë në skemë.

Ndërkohë, referuar shifrave zyrtare, në skemën e sigurimeve shoqërore dhe shëndetësore kontribuojnë rreth 763 mijë kontribuues.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.