7 gabime që nuk duhet të bëni kur hani në një restorant të klasit të lartë

Ushqimi në një restorant të klasit të lartë në vetvete ka të bëjë më shumë me përvojën se sa me ushqimin.

Nëse nuk keni lindur me një lugë argjendi në gojën tuaj ose nuk jeni nga ata të cilët frekuentojnë rregullisht këto lloj restorantesh mund të jeni në mëdyshje për mënyrën se si duhet të veproni, si duhet të bëni një rezervim si dhe për rregullat e pashkruara që këto restorante kanë.

Më poshtë do të gjeni disa këshilla nga ekspertë të kësaj fushe.

1. Mos hiqni dorë kur nuk mund të rezervoni

Zakonisht një mënyrë e mirë për të rezervuar në këto restorante është edhe përmes internetit. Por ndonjëherë nga ngarkesa e madhe apo nga ndonjë gabim i mundshëm që mund të ndodhë në internet mundet që rezervimi juaj  të mos kryhet.

Në rastet kur dëshironi medoemos të hani në një restorant të tillë duhet të rezervoni dhe në mënyrën tradicionale nëpërmjet telefonit.

2. Veshja jo e përshtatshme për vendin

Ekspertja e etikës Julia Esteve-Boyd ju kujton që kurrë të mos vishni xhinse në një restorant të bukur dhe të kontrolloni paraprakisht kodin e veshjes. Ekzistojnë disa rregulla të pashprehura për mënyrën se si të visheni dhe të veproni në një restorant të klasit të lartë.

3. Mos harroni rregullat bazikë të tavolinës

Në një restorant të tillë ju kurrë nuk duhet të thërrisni apo bërtisni për vëmendjen e kamarierit. Asnjëherë nuk duhet të kërkoni për ketchup apo mustardë. Një nga rregullat e pashkruar qw duhet të respektoni është  të bëni porosinë pasi janë mbledhur të gjithë pjesëtarët e tavolinës për të porositur një pije. Zonjat duhet të kenë parasysh të mos e vendosin kurrë kuletën mbi tavolinë.

4. Edhe në këto restorante mund të sillni verën tuaj kundrejt një pagese

Lista e shisheve të verës, sidomos me gamën e gjerë të çmimeve mund të jetë e frikshme. Por Sommelier, Master Sur Lucero ju kujton se në restorante të tilla ju mund të kurseni para duke sjellë verën tuaj me një tarifë të caktuar.

5. Konsultohuni me kamarierin për alergjitë që keni apo dietën tuaj

Nëse konsultoheni paraprakisht për alergjitë e ndryshme që mund të keni apo edhe për dietën tuaj, do të ngeleni më shumë se sat ë kënaqur në këto restorante. E njëjta gjë ndodh edhe nëse ju keni një kufizim kohor apo keni një takim pune. Ju mund të keni njoftoni për orarin e kufizuar në mënyrë që ushqimi juaj të serviret më shpejt.

6. Porositja e ushqimit tuaj të preferuar

Mund të jetë joshëse porositja e një pjate të njohur në menu por përpiquni t’i rezistoni. Kur shkoni në një restorant të mirë ngrënieje, porositja jashtë zonës suaj të rehatisë duhet të jetë lëvizja juaj.

7. Mos kini frikë të pyesni kamarierin në rast se nuk jeni të sigurt për porosinë

Shpeshherë kur shkoni në një restorant të tillë mund të jeni në mëdyshje për atë çka duhet të porosisni pasi pjesën më të madhe të pjatave nuk e keni provuar. Në raste të tilla mos ngurroni të pyesni kamarierin, ai është i trajnuar për t’ju udhëzuar dhe është në dijeni të gjithçkaje që menuja përmban.

 V.Hydi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.