7 turistë për banor – Toleranca e Islandës vihet në provë. Qeveria diskuton masat për turizmin
Islanda është shndërruar në një destinacion turistik aq popullor, saqë numri i vizitorëve të huaj e tejkalon atë të popullsisë vendase në raportin 7 me 1. Qeveria tashmë po konsideron nëse ishulli në Oqeanin Atlantik mund dhe a duhet të presë edhe më tepër vizitorë.
“Sektori është në rritje dhe po bëhet një industri e vërtetë në Islandë. Bashkë me të vijnë natyrisht edhe shumë sfida, të cilat ne duhet të jemi gati për t’i përballuar”, tha Thordi Kolbrun Gylfadottir, ministri i turizmit në Islandë.
Më shumë se 2.3 milionë njerëz pritet ta kenë vizituar Islandën deri në fund të këtij viti, nga gati 1.8 milionë vitin e kaluar. Numri në total i netëvë të fjetura në 2016-ën ishte 7.8 milionë dhe kjo e bëri turizmin eksportin më të madh të Islandës dhe industrinë e dytë më të madhe pas tregtisë. Në vitin 2016, ajo zuri 8.4 % të produktit të brendshëm bruto.
Tashmë pyetja është se si munden 347 mijë islandezët të evitojnë mbipopullimin dhe dëmet nga turizmi. Banka Qendrore paralajmëroi se vizitorët po vënë nën presion tregun e brendshëm të pasurive të paluajtshme, për shkak të rritjes së qirave disa ditore.
“Na duhet të hartojmë masa në mënyrë që të rrisim tolerancën. Ndonjëherë bëhet fjalë për të forcuar infrastrukturën, ndërsa herë të tjera për të drejtuar aksesin në zona të veçanta”, tha ministri i turizmit.
Qeveria e mëparshme kishte propozuar rritjen e TVSH-së për turizmin, e cila aktualisht është 11%, por kjo nismë ishte përballur me kundërshtime të forta nga industria. Në fund të fundit, Islanda është që tani një destinacion shumë i shtrenjtë, ndërsa kompanitë e turizmit përballen me paga më të larta dhe një kronë shumë më të fortë.
Një tjetër ide që po qarkullon është aplikimi i një tarife të veçantë, e cila do të përdoret për të financuar ruajtjen e pasurive natyre të ishullit.
“Ne ndoshta nuk do të konkurrojmë kurrë me destinacionet me çmime më të ulëta, por njerëzit duhet ta përjetojnë se po i nxjerrin vlerën parave të tyre”, tha ministri.
Shtimi i turizmit në Islandë nisi pas fushatës së vendit pas shpërthimit të vullkanit që lëshoi një re hiri mbi Europë. Qeveria kërkonte të siguronte turistët se vendi ishte totalisht i sigurt. Fushata solli shtimin e fluturimeve drejt vendit, ku shumë njerëz kalonin disa ditë në Islandë për shkak të biletave më të lira të avionit. Suksesi i kombëtares së futbollit dhe veçanërisht xhirimi i shumë skenave të serialit “Game of Thrones” në këtë vend, e bëri Islandën shumë të famshme për bukurinë e saj të egër.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.