71 milionë litra birrë në 10 muaj – Shqiptarët konsumojnë 8.7 milionë litra më shumë se viti 2016

Konsumi i birrës  është rritur gjatë këtij viti. Sipas statistikave zyrtare të Drejtorisë së Përgjithshme të Doganave, sasia e birrës së konsumuar për 10-mujorin  arrin në 71 milion litra, ose 8.7 milion litra më shumë se e njëjta periudhë e një viti më parë.

Sipas këtyre të dhënave, në 10 muaj në tregun vendas janë importuar 34.3 milion litra birrë.

Temperaturat e larta  që shoqëruan  muajt  verës vendin tonë kanë ndikuar edhe në rritjen e konsumit të pijeve në vend, pasi nivelin më të lartë të konsumit e kemi gjatë muajve të verës.

Tregu i birrës është ndër më të “lakmuarit” dhe diskutimet për akcizën e birrës  në kohën kur diskutohet paketa fiskale janë të ashpra. Prodhuesit vendas  gjithnjë janë ankuar se është krijuar një treg i pandershëm dhe kanë kërkuar vazhdimisht uljen e taksës së akcizës për këtë produkt, me arsyetimin e  rritjes së produktit vendas dhe rritjen e punësimit.

Aktualisht prodhimi vendas i birrës e ndan tregun ndërmjet katër kompanive kryesore, Birra Tirana, Birra Stela, Birra Korça, Birra Kaon apo Elbar. Por  një përqindje të lartë në treg zënë edhe  birrat e importit, të cilat në jo pak raste janë favorizuar edhe nga niveli më i ulët i akcizës, duke konkurruar bindshëm prodhimin vendas.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.