74 % më shumë turistë polakë këtë vit në Shqipëri – Diskutohet vendosja e një linje direkte fluturimesh Varshavë -Tiranë
Kryeministri Edi Rama gjatë një konference për mediat me homologen e Polonisë deklaroi se i ka kërkuar kryeministres Szydlo që të inkurajojë kompaninë e fluturimeve polake për të konsideruar mundësinë e vendosjes së një linje direkte mes dy vendeve, e cila do të sillte përfitueshmëri të lartë dhe reciproke në këtë drejtim.
Rama deklaroi gjatë konferencës se nga Janari në Tetor e vizituan Shqipërinë 74 për qind më shumë turistë polakë se vitin e kaluar.
“Ka një potencial të madh për zhvillimin e marrëdhënieve tona ekonomike. Kryeministrja foli për turizmin si një nga pikat më domethënëse të zhvillimeve të kohëve të fundit. E shfrytëzoj këtë mundësi duke thënë se në Janar- Tetor, Shqipërinë e vizituan 74 për qind më shumë turistë polakë se sa vitin e shkuar. I kam kërkuar kryeministres Szydlo të inkurajojë kompaninë e fluturimeve polake për të marrë në konsideratë mundësinë për të vendosur një linjë direkte, që do të sillte një përfitueshmëri të lartë dhe reciproke në këtë drejtim. Kemi diskutuar edhe për propozimin e saj për Konferencën e Tiranës që ne e mirëpresim me falënderime, pasi e konsiderojmë Poloninë një model në zhvillimin dhe transformimin e saj. Ne kemi qenë dhe i jemi mirënjohës Polonisë për mbështetjen në çeljen e negociatave 6 muajt e ardhshëm”, u shpreh Rama.
Kryeministrja e Polonisë gjatë fjalës së saj u shpreh se ka diskutuar me homologun Rama për forumin polako-shqiptar të biznesit, madje për bashkëpunimin në sektorin e turizmit.
“Diskutuam për Forumin Polako-Shqiptar të biznesit. Shqipëria vend i preferuar për turistët polakë, ndaj sektori i turizmit ofron një hapësirë bashkëpunimi me interes të ndërsjelltë të dy vendeve tona. Polonia mbështet reformën në drejtësi. Jemi të gatshëm të ndajmë përvojën me Shqipërinë për mbështetjen mbi njohjen e progresit të bërë nga reformat e ndërmarra për të përcaktuar një datë të qartë për negociatat”, u shpreh Szydlo.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.