8 Marsi me protesta – Në Brazil, Peru, Meksikë, Argjentinë dhe Kili mijëra gra dhe vajza në sheshe
Në shumë vende të botës e sidomos në disa prej vendeve të Amerikës latine, 8 Marsi ka qenë një ditë proteste.
Me mijëra gra dhe vajza kanë dalë nëpër rrugët kryesore të Brazilit natën e së Premtes, duke kërkuar barazi gjinore si dhe fundin e dhunës ndaj grave, por edhe për të kritikuar politikat e Presidentit të djathtë, Jair Bolsonaro.
Protestat për ditën ndërkombëtare të gruas u zhvilluan në 9 qytete të ndryshme të Brazilit, përfshirë Sao Paulo, Brasilia apo Rio de Janeiro.
Brazili është mes 5 vendeve me numrin më të lartë të vrasjeve të grave në botë. Qindra gra apo vajza dhunohen çdo orë në vend, kryesisht nga partnerët e tyre.
Protesta nuk ka pasur vetëm në Brazil, por dhe në Peru, ku mijëra gra dolën në rrugët e kryeqytetit Lima për të kërkuar barazi gjinore por edhe luftë dhunës ndaj grave.
Edhe në Meksikë, vendin me normën më të lartë të dhunës ndaj grave në botë, e njëjta situatë, me gratë dhe vajzat që dolën nëpër rrugët e kryeqytetit të vendit më 8 Mars për të kërkuar të drejtat e tyre. Edhe në Argjentinë dhe Kili ka pasur protesta.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.