80 certifikata për mjeshtërit e rinj në Gjirokastër, Korçë dhe Berat
Janë certifikuar 80 mjeshtër dhe ndihmësmjeshtër të rinj për punimin e gurit, drurit, metalit dhe suvasë në ndërtesa historike. Gjirokastra, Korça dhe Berati kanë tashmë mjeshtërit e tyre të certifikuar falë projektit “Aftësi për Punësimin e së Nesërmes,” nga Chwb Albania.
Të pranishëm në ceremoninë e mbajtur në Akademinë e Arteve ishin Ministrja e Kulturës, Mirela Kumbaro, drejtorja ekzekutive e CHwB Albania, Lejla Hadzic, përfaqësues të drejtorive rajonale kombëtare, etj.
Për herë të parë në 3 dekada, specialistët e vjetër të restaurimeve patën mundësinë të trajnojnë në teori dhe praktikë gjeneratën e re të mjeshtërve.
Nëpërmjet këtij projekti synohet ruajtja e teknikave tradicionale, kualifikimi i personave që operojnë në këtë fushë, si dhe rritja e cilësisë së punimeve.
Po ashtu, ka për qëllim edhe për të rritur mundësitë e punësimit për të rinjtë dhe emigrantët që vendosin të kthehen për të jetuar dhe punuar në Shqipëri.
Projekti “Aftësi për Punësimin e së Nesërmes” i financuar nga GIZ dhe SIDA, i hap rrugë zbatimit të kursit profesional 6-mujor “Mjeshtëritë dhe teknikat tradicionale në ndërtim”.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.