80 milionë dollarë për transparencën fiskale – Në prag ratifikimi huaja me Bankën Ndërkombëtare për Rindërtim dhe Zhvillim
Shqipëria do të përfitojë një hua prej 80 milionë dollarësh nga Banka Ndërkombëtare për Rindërtim dhe Zhvillim, synim kryesor i së cilës do të jetë transparenca e financave publike. Marrëveshja është miratuar nga Qeveria në nëntor të vitit të shkuar dhe është në prag ratifikimi nga Kuvendi dhe pritet të votohet në fillim të këtij viti.
Sipas relacionit të Projektligjit të depozituar në Kuvend, ky program do të ndihmojë Shqipërinë në përmirësimin e financave për rritjen, përkatësisht, rritjen përmes ekonomisë digjitale dhe shfrytëzimit të pasurive natyrore të Shqipërisë, duke përfshirë edhe stimulimin e zhvillimit të modeleve të turizmit që integrojnë komunitetet lokale.
Tri fushat kryesore të fokusit janë: • Rikthimi i ekuilibrave makroekonomikë; • Krijimi i kushteve të rritjes së përshpejtuar të sektorit privat; • Forcimi i menaxhimit të sektorit publik dhe ofrimit të shërbimeve.
Shtylla e parë e këtij programi mbështet Shqipërinë në miratimin e reformave kryesore që forcojnë transparencën dhe qëndrueshmërinë e financave publike. Së pari, kjo shtyllë forcon aftësinë e mbledhjes të të ardhurave për të ndërtuar hapësirë fiskale dhe për të ulur borxhin e qeverisë. Kjo shtyllë mbështet publikimin e rishikimit të parë të plotë të shpenzimeve tatimore “Tax Expenditure” dhe institucionalizimin e botimeve të rregullta në vazhdim.
Shtylla e dytë ndihmon në përmirësimin e financave për rritje e rimëkëmbje. Për të financuar investimet e nevojshme me qëllim përmirësimin e modelit të rritjes së ekonomisë shqiptare, kjo shtyllë forcon mobilizimin e kapitalit privat duke kontribuar në rritjen e qëndrueshme të biznesit dhe krijimin e vendeve të punës.
Ndërsa shtylla e tretë e mbështet mundësitë sektoriale për zhvillim të qëndrueshëm. Qëllimi është të mundësohet krijimi i më shumë vendeve të punës të kualifikuara, duke forcuar vitalitetin dhe qëndrueshmërinë e modelit të rritjes së Shqipërisë.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.