803 vende pune për studentët – 1 javë kohë për aplikimet, deri më 27 janar
Studentët të cilët dëshirojnë të aplikojnë për t’u punësuar pranë administratës publike kanë në dispozicion edhe 1 javë kohë .Qeveria ka vendosur datën 27 janar si afatin e fundit për aplikim duke ofruar për këtë vit 803 vende pune në total pranë administratës publike për studentët të cilët janë ekselentë. 601 studentë pritet të punësohen në shërbimin civil dhe 202 punësime të tjera me kod pune. Ndryshe nga sa ndodhte më parë, të rinjtë të cilët do të aplikojnë këtë vit do të rekrutohen pa kaluar në proceset e konkurrimit.
Studentët do të kenë mundësinë e përzgjedhjes për vendet e punës dhe ky proces do të varet nga mesatarja e gjithsecilit, prioritet pritet të kenë ata student të cilët kanë mesatare më të lartë. Aplikimet për punësime priten të rihapen sërish brenda vitit . Punetembare.al është portal i vënë në dispozicion për të gjithë studentët të cilët dëshirojnë që të punësohen në administratë.
Numri më i lartë i punësimeve ofrohet kryesisht në sektorin doganor në degë të ndryshme në vend, në Sektorin e Monitorimit të Kompetencave Vendore dhe Funksioneve të Deleguara në disa qarqe si edhe në Sektorin e Kontrollit në Pikat e Inspektimit Kufitar në shërbimin veterinar etj.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.