94 milionë euro për bujqësinë – Programi IPARD, Gjeci: Aplikimet në Maj, 16 mln euro brenda vitit

Nga fondet prej 94 milionë euro të akorduara nga Bashkimi Europian dhe qeveria shqiptare përmes programit IPARD, në formë grantesh për financimin e fermerëve, 16 milionë prej tyre do të disbursohen brenda këtij viti. Në një intervistë për TV SCAN, Drejtori i IPARD, Grigor Gjeci, bën me dije se thirrja e parë hapet në muajin Maj.

“Ky buxhet prej 17 milionë eurosh, plus 15 përqindëshin e qeverisë shqiptare, është i akorduar në vite. Ne tashmë për thirrjen e parë kemi në dispozicion 13 milionë euro, të cilat janë nga Bashkimi Europian fonde të cilat janë akorduar për vitin 2016, ne tashmë jemi në vitin 2018, por me rregullin “n+3”, që do të thotë se deri në vitin 2019 ne duhet t’i kemi konsumuar këto fonde. 13 milionë euro plus 3 milionë, që i bie 25%, shkon gati 16 milionë euro që i kemi në dispozicion në thirrjen e parë. Pastaj çdo vit do të bëjmë thirrje të reja. Ne fondet i kemi deri në vitin 2020, do të thotë se ne do t’i përdorim deri në vitin 2023”, tha Gjeci.

Por që aplikantët të jenë përfitues, duhet të jenë të regjistruar në QKB, të kenë një plan të mirë biznesi dhe të kryejnë investimin paraprakisht. Granti që arrin deri në 60 për qind të investimit, disbursohet në fund të tij.

“Kushti kryesor është që duhet të parapaguhet nga përfituesi. Kjo do të thotë që përfituesi duhet patjetër që të jetë i lidhur me institucionet financiare, për një kredi afatshkurtër deri në përfundimin e investimit, i cili rimbursohet sipas masave. Sepse në masën e parë, masa e grantit fillon nga 60% për investimin për shpenzimet e pranueshme. Nëqoftëse është një fermer nën moshën 40 vjeç, një fermer i ri në periudhën e firmosjes së kontratës atëherë është 65%. Nëqoftëse është një investim në zonat malore, ku Shqipëria është klasifikuar rreth 70% e territorit në zonat malore, është 70%, pra pjesa e grantit është pjesë shumë e madhe”, sqaroi Drejtori i IPARD.

Programi i IPARD do të zbatohet në tre masa kryesore, investime në fermë, përpunim te produkteve si dhe në diversifikimin e ekonomisë, ku do të jenë përfitues dhe projekte jo bujqësore.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.