94 mln euro grant për bujqësinë – Shefi i IPARD në KE vendos tre kushte, kërkon transparencë

Brenda muajit Prill priten të hapen aplikimet e fermerëve për të përfituar nga fondi në formë granti prej 94 milionë euro i vënë në dispozicion përmes programit IPARD nga Bashkimi Europian në vlerë 71 milionë euro dhe qeveria shqiptare 24 milionë euro.

Drejtori i Përgjithshëm i IPARD në Komisionin Europian, vuri në dukje se Shqipëria i ka plotësuar kriteret për të përfituar këto fonde, por vendosi tre kushte kryesore, të cilat do të jenë vendimtare për alokimin e financimeve të mëtejshme.

“Janë tre kushte që duhet të plotësohen. Mos e bëni të komplikuar si proces në mënyrë që fermerët të mund të aplikojnë dhe përfitojnë nga këto fonde. Dua që ju të tregoni se dini si ti përdorni paratë, pasi jemi në një fazë që po shohim se si do të financojmë 7 vitet e ardhshme, pas vitit 2020. Është gati lancimi i programit IPARD dhe jam këtu për tu siguruar që të gjitha paratë të shkojnë tek fermerët dhe dua të shoh rezultate herës tjetër që do të vij.”

Në takimin e tretë të Komitetit të Monitorimit të IPARD II, Ministri I Bujqësisë, Niko Peleshi, garantoi se shpërndarja e fondeve do të bëhet në mënyrë transparente dhe fermerët do të asistohen për ta pasur më të thjeshtë procesin.

Pas mbylljes së aplikimeve për Skemat Kombëtare, fermerët do të kenë një dritare tjetër financimi. 94 milion euro do të shkojnë për financimin në bujqësi deri në vitin 2020 dhe do të mbështeten të gjitha degët e këtij sektori.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.