94 mln euro për bujqësinë – IPARD II, Peleshi: Në pranverë hapen aplikimet, bëni plane të mira biznesi
Rreth 94 milion euro është fondit që do të shkojë për financimin e bujqësisë dhe zhvillimin rural në vend. Ministri Niko Peleshi ka shpallur hapjen e programit të Bashkimit Europian, IPARD II, ku 71 milion janë vënë në dispozicion nga BE dhe 23 milion euro nga qeveria shqiptare. Aplikimet do të hapen në pranverë dhe nga bizneset e interesuara kërkohen plane serioze biznesi.
“Nga pranvera ne të jemi gati jo vetëm si Agjenci e Zhvillimit Bujqësor dhe Rural apo si Ministri e Bujqësisë, por edhe si grupe interesi. Pra, fermerët, agropërpunuesit të cilët kanë projekte të ngelura në pritje për shkak të mungesës së financimeve të nevojshme, të bëhen gati të hartojnë planet e biznesit, të kontraktojnë konsulentë, natyrisht profesionistë në mënyrë që të plotësojnë të gjitha kushtet që do të bëhen të njohura shumë shpejt për të përfituar nga masat e programit IPARD.”
Problem në këtë drejtim është aftësia për të përthithur fondet pasi kriteret e vendosura nga Bashkimi Europian janë tejet strikte. Ministri Peleshi bëri me dije se financimet do të shkojnë për investime në fermë, investime në përpunim, diversifikimi i fermave dhe asistenca teknike.
“IPARD-i mbështet me një shumë prej, me një total prej 31 milionë e 400 mijë euro investimet në fermë. Masa e investimit fillon nga 10 mijë euro dhe përfundon në 500 mijë euro dhe natyrisht ka një përqindje në vlerës së investimit që nuk është i vogël, është minimumi 60 për qind, pra shkon deri në 60 për qind, por, në zonat malore shkon në 70 për qind. Shqipëria një përqindje të konsiderueshme të saj është malore. Pra, rreth 70 për qind të investimeve në fermë mbulohen me grant nga ky program.”
Drejtoresha e Agjencisë së Zhvillimit Bujqësor dhe Rural bëri me dije se fermerët që kanë përfituar fonde, nuk mund të jenë më përfitues, deri në mbyllje të projekteve të financimit që kanë marrë në dorëzim.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.