“96% e jetimëve, socialë” – S’parandalohet dërgimi në jetimore, ministria: 65 milion lekë për deinstitucionalizimin
Rreth 96% e fëmijëve që marrin shërbim në institucionet e përkujdesit shoqëror nuk janë jetimë biologjikë, por vijnë nga familje të pafuqizuara, në vështirësi ekonomike dhe mungesë të aftësive prindërore e që ndryshe konsiderohen si jetimë socialë. Ndërkohë që, nga një vlerësim i kryer nga Ministria e Shëndetësisë dhe Mbrojtjes Sociale del në pah se mungojnë mekanizmat shtetërore për parandalimin e institucionalizimit, pra dërgimin e fëmijëve nëpër jetimore. Sipas këtij dikasteri, këta fëmijë janë veçanërisht të prekshëm ndaj efekteve të dëmshme të institucionalizimit sepse institucionet nuk ofrojnë një mjedis të përshtatshëm për zhvillimin e tyre moral, psikologjik dhe emocional.
“70% e fëmijëve të vlerësuar kanë vonesa në zhvillim sidomos atë ambiental”,-theksohet ndër të tjera në “Planin Kombëtar të Deinsitutcionalizimit 2020-2022, të nxjerrë për konsultim publik nga MSHMS, teksa evidentohet se shërbimet aktuale janë fokusuar tek përkujdesi fizik dhe jo tek zhvillimi individual. Nisur nga kjo situatë, synohet që deri në vitin 2022, çdo fëmijë në institucionet e përkujdesit apo në rrezik institucionalizimi të mbështetet me shërbime të reja alternative, në familje kujdestare apo shërbime të specializuara.Një prej masave konkrete në këtë drejtim është ndërmarrja e një moratoriumi për institucionalizimin e fëmijëve.
Kështu, do të synohet mos ranimi i fëmijëve 0-3 vjeç nëpër jetimore, por mbështetja e familjes me shërbime për nënën dhe fëmijën. Gjithashtu, moratoriumi do të përfshijë dhe mos pranimin e fëmijëve 0-6 vjeç në jetimoren e Korçës dhe Vlorës. Plani parashikon dhe një sërë veprimesh të tjera, ndërkohe që kostoja e përgjithshme e përllogaritur për zbatimin e masave administrative dhe arritjen e objektivave të këtij plani është 65,864,000 lekë. Burimet e përcaktuara për Ministrinë e Shëndetësisë dhe Mbrojtjes Sociale për programet buxhetore “Përkujdesi Social” dhe “Planifikim, Administrim dhe Menaxhim” mbulojnë rreth 48% të kostos së përllogaritur për këtë plan, përkatësisht 31,888,000 lekë. Ndërkohë që, burimet financiare nga donatorët mbulojnë rreth 52% të kostos së planit, përkatësisht rreth 33,976,000 lekë, kryesisht nga UNICEF, Save the Children dhe donatorë të tjerë.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.