A do ketë britanikë në plazhet evropiane? Hancock: Të vaksinuarit mund të udhëtojnë së shpejti. Prioritet siguria

Britania po përpiqet të zbusë kufizimet në udhëtime për të vaksinuarit plotësisht,  për të lejuar njerëzit që të gëzojnë pushimet e Verës në plazhet europiane, sipas Sekretarit të Shëndetësisë, Matt Hancock.  Për momentin, qytetarët britanikë janë ndaluar për të udhëtuar në shumë vende, përfshirë në Bashkimin Europian, pasi rregullat e karantinës dhe testeve janë të lodhshme dhe të shtrenjta.  Turistët britanikë janë shpenzuesit e dytë më të mëdhenj jashtë vendit të tyre pas gjermanëve, e për rrjedhojë mungesa e tyre do të rëndonte ekonomitë e Europës Jugore.  Sektori i turizmit në Britani është goditur gjithashtu nga rënia e të ardhurave prej masave të karantinës.  Hancock tha se qeveria kërkon të lejojë njerëzit të udhëtojnë jashtë me familjet e tyre, por vetëm kur kjo të jetë e sigurtë. “Qëllimi i programit të vaksinimit është që të mund të hiqen masat e kufizimeve dhe që njerëzit të mbrohen nga vaksinat e jo nga këto masa”- tha Hancock.   Prej muajsh, ministrat britanik kanë dhënë sinjale kontradiktore mbi kohën dhe mënyrën e zbutjes së rregullave të udhëtimit.  Kryeministri Boris Johnson tha në nisje të javës se udhëtuesit do të përballen me probleme dhe vonesa këtë vit nëse kërkojnë të udhëtojnë jashtë vendit, për shkak se prioriteti është mbajtja e vendit të siguritë. Destinacionet popullore të pushimeve për britanikët, përfshirë Spanjën, Portugalinë, Francën, Italinë dhe Greqinë,  janë etiketuar në ngjyrë të verdhë, çka kërkon që pasagjerët të bëjnë 3 teste të shtrenjta të Covid-19 dhe të izolohen për 10 ditë në kthim.

Klevis Llaha – SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.