A do të duhet të vaksinohemi kundër Covid çdo 6 muaj? – Ekspertët: Nuk është e nevojshme!
Vaksinimi periodik i çdo banori të planetit kundër Covid nuk është i qëndrueshëm: Andrew Pollard, profesor në Universitetin e Oksfordit, i cili kontribuoi në zhvillimin e vaksinës Oxford-Astra Zeneca, e thotë me zë të lartë dhe qartë. Eksperti deklaroi se dhënia e dozave të përforcimit në të gjithë botën çdo katër apo gjashtë muaj jo vetëm që nuk është e mundur, por ndoshta as e nevojshme.
Sipas ekspertit, duhet të ketë të dhëna të mëtejshme për të vendosur se kur, sa shpesh dhe nëse do të jetë e nevojshme të vaksinohen më të rrezikuarit – kryesisht të moshuarit dhe personat me sëmundje të mëparshme.
Ndërsa Pollard kundërshton idenë e një doze të katërt për të gjithë, Izraeli tashmë ka filluar të administrojë një dozë tjetër përforcuese për mbi të 60-at, dhe ministri gjerman i shëndetësisë Karl Lauterbach tha se një dozë e katërt “do të jetë e nevojshme”.
Nga ana tjetër, më i matur është imunologu amerikan Anthony Fauci, sipas të cilit është ende herët të flitet për dozën e katërt: “Një nga gjërat që do të duhet të vëzhgojmë me kujdes është kohëzgjatja e mbrojtjes së dhënë me dozën përforcuese të vaksinave mRNA”, tha ai duke vënë në dukje se nëse doza përforcuese mbron më mirë se vetëm dy doza, një dozë e katërt mund të mos jetë e nevojshme për një kohë të gjatë.
Duhet theksuar edhe një herë se e ardhmja është vetëm pjesërisht në duart tona: ne jemi përballur me një virus që çdo ditë (ose pothuajse) na detyron të rishikojmë besimet tona në dritën e varianteve të reja, kështu që na mbetet vetëm të presim dhe të shpresojmë se Omicron është mënyra për të dalë nga makthi i pandemisë. FCS
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.