A do ti rikthehet Shqipëria sërish izolimit?! Paralajmërimi i ministres Manastirliu

24 orëshi i fundit, ka shënuar për të dytën herë 18 raste të reja me Covid-19, një numër ndjeshëm në rritje, në krahasim  me gjysmën e parë të javës ku janë shënuar vetëm nga 4 raste. Këto shifra, detyruan sot Ministren e Shëndetësisë Manastirliu, gjatë një komunikimi për mediat të bëjë edhe njëherë një thirrje publike për të gjithë qytetarët që të zbatojnë në mënyrë rigoroze rregullat për të mos u rikthyer në gjendjen e mëparshme.

“Ekspertët tanë e kanë thënë që në kryer të herës. Faza e lehtësimit merr kuptim vetëm nëse shoqërohet me një ulje të qëndrueshme të numrit të infektimeve. Plani i lehtësimit të masave varet vetëm nga bashkëpunimi me ju. Është e vërtetë që ndëshkimet nuk janë zgjidhja, por është po aq e vërtetë se nuk mund të penalizohet një popull i tërë nga një pakicë, veprimet e së cilës mund të shkaktojnë dëme të pallogaritshme”, tha Manastirliu.

Ndër të tjera, ministrja Manastirliu theksoi se nëse numri i rasteve të të prekurve do të vijojë të jetë në rritje, do të përdoren më mënyrë të menjëhershme, frenat e emergjencës, për të mos kaluar në një valë të dytë goditëse.

Sigurisht nuk ka vend për alarm, por jemi në një moment ku kërkohet përgjegjshmëri nga çdo qytetar. Mbrojtja e shëndetit të qytetarëve është mbi gjithçka. Ditët në vijim do të jenë vendimtare për planin e ri-hapjes” deklaroi Manastirliu.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.