A duhet mbajtur maska në shkollë? – Këshillat kontradiktore/Shahini: Është detyrim. ISHP: Deri në klasën e 5-të, vetëm rekomandim

Teksa qeveria ka vendosur hapjen e shkollave në datën 14 shtator, ministrja e Arsimit, Sportit dhe Rinisë, Besa Shahini ka postuar në rrjetet sociale një video sensibilizuese mbi rëndësinë dhe rregullin e mbajtjes së maskës në shkollë. Në video shfaqen disa nxënës të shkollës 9-vjeçare “Servete Maçi”, ndërkohë që Shahini e shoqëron postimin me komentin se “Mbajtja e maskës është e detyrueshme, sepse kjo është e vetmja mënyrë se si ne të mbrojmë veten dhe të tjerët”.

Megjithatë, ndonëse postimi i misnitres synon të bëjë të qarta rregullat që duhet të ndjekin nxënsit, ai bie në kundërshtim me vetë protokollin e sigurisë të miratuar nga Instituti i Shëndetit Publik, për frenimin e COVID-19 në shkolla. Referuar dokumentit të publikuar mbajtja e maskës gjatë mësimit për nxënësit e ciklit të ulët 9-vjeçar është vetëm e e rekomandueshme, ndërsa për ciklin e lartë 9-vjeçar dhe të mesëm maska është detyrim.

Në fakt, edhe Organizata Botërore e Shëndetësisë në rekomandimin e fundit të saj thotë se maskat mbrojtëse duhet të mbahen nga çdo person duke filluar nga mosha 12 vjeç. Në bazë të dokumentit të publikuar nga OBSH  nuk rekomandohet mbajtja e maskës për më të miturit nën 5 vjeç, ndërsa nga 6 në 11 vetëm në rast të veçanta kur ndodhet në zonë me rrezik të lartë transmetimi.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.