Abuzimet me rrugët – Tre zyrtarë të Krimit Ekonomik në Prokurori për Tiranë-Elbasan
Pas 3 audituesve të Ministrisë së Energjisë dhe Infrastrukturës, ka qenë radha e zyrtarëve të Krimit Ekonomik pranë Policisë së Shtetit të dëshmojnë përpara Prokurorisë së Krimeve të Rënda lidhur me abuzimet në Rrugën Tiranë-Elbasan. Të martën dhanë dëshmitë e tyre kreu i kësaj strukture Lutfi Minxhozi dhe dy ekspertë të saj.
Ata u pyetën lidhur me hetimet që struktura e tyre ka kryer mbi tre ish zyrtarët e Autoritetit Rrugor shqiptar që tashmë janë të arrestuar për këtë çështje: Dashamir Xhika, ish-drejtor i ARRSH, Albens Alite dhe Aksel Qurduka, dy ish-drejtuesit e Njësisë së Menaxhimit të Projektit të rrugës Tiranë-Elbasan.
Më parë lidhur me këto abuzime të cilat vlerësohen se arrijnë në 54 milionë dollarë, janë thirrur nga Prokuroria e Krimeve të Rënda dy ish-Ministrat e Transportit, Edmond Haxhinasto dhe Sokol Dervishaj.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.