Abuzimi me policat e sigurimit të automjeteve – AMF merr masa për disa agjentë dhe bën thirrje për kujdes nga konsumatorët

Autoriteti i Mbikëqyrjes Financiare ka ndërmarrë një aksion për kontrollin e zbatimit të rregullave të reja të shitjes së Sigurimit të Detyrueshëm Motorrik, TMPL.

Prej 1 Dhjetorit 2007 kontratat e sigurimit të detyrueshëm MTPL duhet të shiten vetëm nëpërmjet regjistrit elektronik online.

Si pasojë e shkeljeve të konstatuara gjatë inspektimit, janë marrë masa për pezullimin e ushtrimit të veprimtarisë për një periudhë 6-mujore për një agjent në sigurime dhe katër punonjës të shoqërive të sigurimit, ndërsa i është ndaluar ushtrimi i veprimtarisë një agjenti tjetër në sigurime.

Bordi i Autoritetit vendosi t’u kërkojë shoqërive të sigurimit marrjen e disa masave për rregullimin e situatës, teksa inspektimet në terren do të vazhdojnë.

Gjithashtu, AMF u ka bërë thirrje konsumatorëve që të kontrollojnë online policën e tyre të sigurimit MTPL në faqen e internetit të Autoritetit, duke plotësuar të dhënat e kërkuara. Në rast se polica nuk gjendet, ata duhet të njoftojnë Autoritetin, ose strukturat e tjera ligjzbatuese për të mos rënë pre e abuzimeve.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.