Aeroporti i Rinasit – Kanë hyrë 308 mijë persona, iu është refuzuar dalja 177 të tjerëve
Gjatë muajit Gusht kanë hyrë në Shqipëri 308.497 shtetas shqiptarë e të huaj. Ndërsa jashtë kufijve të huaja kanë dalë 201.332 shtetas shqiptarë e të huaj.
Krahasuar më një vit më parë ka pasur një rritje të madhe të fluksit të hyrjes për në vendin tonë, ku numri arrin deri në 13.500 shtetas shqiptarë dhe të huaj në ditë.
Sipas raportit të Policisë Kufitare në Rinas 177 shtetas iu është refuzuar dalja, bazuar në masat shtesë të përcaktuara në urdhrin e Drejtorit të Përgjithshëm të Policisë së Shtetit.
Aktualisht në Rinas po punohet me 7 sportele në hyrje dhe 5 në dalje.
Në muajin Gusht nga shërbimet e Policisë Kufitare Rinas, janë arrestuar 9 shtetas, si dhe janë proceduar penalisht në gjendje të lirë 8 të tjerë, për veprën penale “Falsifikimi i pasaportave, letërnjoftimeve ose i vizave”.
8 shtetas janë shpallur në kërkim, për vepra të ndryshme penale, ndërsa janë proceduar penalisht për veprën penale atë të ”Braktisjes së fëmijëve të mitur” 4 shtetas (dy burra e dy gra).
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.