Aeroporti i Vlorës, projektligji në Kuvend! Relacioni: Tarifa më të ulëta se Rinasi! Negociatat, synim ndikimin sa më minimal në buxhet
Pas miratimit nga qeveria, në Kuvend është depozituar për t’u shqyrtuar me procedurë të përshpejtuar projektligji për përcaktimin e procedurës së veçantë të negociimit dhe lidhjen e kontratës me shoqëritë që kanë ofertuar për ndërtimin dhe mirëmbajtjen e aeroportit të Vlorës.
Në referim të përcaktimeve të ligjit nr.55/2015, “Për investimet strategjike në Republikën e Shqipërisë”, investitorët strategjikë të veçantë përfitojnë nga mundësia e miratimit të kontratës përkatëse të investimit strategjik nga Kuvendi, me ligj të veçantë, me qëllimin për të rritur sigurinë e marrëdhënies juridike me shtetin shqiptar. Ky projektligj vjen si bashkëpropozim ndërmjet Ministrisë së Infrastrukturës dhe Energjisë dhe Ministrisë së Financave dhe Ekonomisë.
Në relacionin e nismës së depozituar në Kuvend jepen disa argumenteve se pse është përzgjedhur Vlora, si pritet të jetë ndikimi në buxhet, tarifat që do të aplikohen e detaje të tjera lidhur me ndikimin që do të ketë në lëvizjen e njerëzve.
Tarifat
“Nga një shqyrtim paraprak i propozimit të shoqërive konstatohet se tarifat që propozohen të aplikohen në këtë aeroport do të jenë më të lira se ato që aplikohen nga TIA (Aeroporti i Tiranës). Struktura e saktë e kësaj tarife do të përcaktohet në përputhje me studimet dhe diskutimet e mëtejshme me qeverinë shqiptare. Komisioni ndërinstitucional që do të vlerësojë këtë projekt do të shqyrtojë në detaje ofertën me aspektet teknike dhe do të ndjekë hapat e mëtejshëm në përputhje me përcaktimet ligjore” evidentohet në relacion. E sa i përket ndikimit në buxhetin e shtetit, relacioni evidenton se “qëllimi i negociimit të kësaj kontrate do të jetë pasja e një ndikimi minimal në buxhetin e shtetit”.
Efektet
Relacioni evidenton gjithashtu se ndërtimi i një aeroporti në qytetin e Vlorës do të ndikonte në hapjen e mëtejshme të hapësirës ajrore shqiptare. Vlora, për shkak të pozicionit gjeografik është një pikë strategjike për ndërtimin e këtij aeroporti, së pari për aksesin e shtuar të turizmit, por edhe lidhjen me shtetet fqinje, që do e bënte këtë aeroport shumë atraktiv edhe për qytetarët e vendeve fqinje.
“Vlora është një nga qendrat më të populluara në Shqipëri. Me një kohë udhëtimi të shkurtër, pjesës më të mirë të popullsisë do t’i shërbejë një aeroport i ri. Rrjedhimisht, ky aeroport do t’i shërbejë më mirë popullsisë që është e përqendruar në jug, por jo vetëm. Shqipëria është duke provuar një rritje të veçantë në turizmin ndërkombëtar dhe qendra e gravitetit ndërkombëtar të tërheqjes së turizmit ka drejtimin e pjesës jugore të vendi” vijon relacioni.
Në 10 vitet e shkuara, kapaciteti i aviacionit civil në Shqipëri, nëpërmjet aeroportit të vetëm ndërkombëtar “Nënë Tereza”, ka parë një rritje të vazhdueshme të numrit të pasagjerëve, me një rritje mesatare vjetore prej 10 % deri në 2017.
“Në tri vitet e shkuara u pa një rikuperim në shifra, duke pasur një rritje mesatare vjetore prej afro 15 %, trend i cili parashikohet të vazhdojë edhe për 4-vjeçarin e ardhshëm, me futjen tashmë të Shqipërisë në hartën e destinacioneve turistike evropiane. Pavarësisht kësaj rritjeje të regjistruar, po të krahasohemi me rajonin, duke iu referuar edhe disa llogaritjeve të 4 viteve më parë, do të vëmë re një hapësirë të madhe në kapacitet. Pavarësisht numrit të pasagjerëve, mund të shohim që
fqinjët, përveç Kosovës, kanë më tepër aeroporte dhe më shumë kompani ajrore që operojnë në to se sa Shqipëria (Mali i Zi 2, Maqedonia 2, Greqia 35). Për më tepër, po t’i shtojmë krahasimit edhe faktorin turizëm, një nga fushat kryesore drejt së cilës po orientohet ekonomia e vendit, do të vinim re një diferencë gati 7-fish dhe 5-fish, të raportit popullsi/pasagjerë ajrorë, me Greqinë dhe Malin e Zi përkatësisht, si shembuj të zhvillimit më të lartë të turizmit në rajonin tonë. Kjo diferencë tregon se ka ende hapësirë për rritje, veçanërisht në sektorin e fluturimeve turistike charter dhe atyre me kosto të ulët. Duke pasur parasysh se 51 % e turistëve ndërkombëtarë udhëtojnë me transport ajror (ATAG, 2012), lind e nevojshme domosdoshmëria për një portë hyrëse ajrore në zonën me potencial më të lartë turistik, pra rajonin e jugut. Kjo shifër do të ishte më e lartë për vendin tonë, rreth 80 %, kur konsiderojmë largësinë gjeografike të aeroportit “Nënë Tereza” me zonën turistike të jugut të vendit” shkruhet në relacion.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.