Afat i ri për tokat e ndërmarrjeve bujqësore, propozimi në Kuvend: Shtyrje deri me 30 qershor 2019! Hiqet detyrimi i vendbanimit
Në Kuvend janë propozuar dy nisma ligjore që në thelb synojnë t’i japin një ritëm të ri procesit të pajisjes me akte pronësie të atyre që ligjërisht njihen si përdorues të tokës bujqësore. Një nga ndryshimet e propozuara synon të heqë kufizimin nga ligji ekzistues përsa i takon kritereve që duhet të përmbushin familjet bujqësore ose individët për mos ndryshimin e vendbanimit të tyre prej datës 1.10.1992.
“Shumë familje bujqësore apo pjestarë të këtyre familjeve, të cilët kanë përfituar tokë në përdorim sipas dispozitave të ligjit dhe akteve nënligjore në fuqi, nuk mund të pajisen me aktin e marrjes në pronësi të tokës për shkak të kufizimeve të vendosura në legjislacion për mos ndryshimin e vendbanimit. Ky ndryshim do shërbejë për zgjidhjen e problematikave të përmendura me lart” shkruhet në relacionin e nismës që është në proces diskutimi parlamentar.
Një ndryshim tjetër që propozohet është edhe zgjatja e afatit të përfundimit të procesit të plotësimit të titujve të pronësisë mbi tokën bujqësore, për territoret e ish-ndërmarrjeve bujqësore nga data 31 dhjetor 2018, i parashikuar me ligjin 102/2017 në 30 qershor 2019, shkruan portali ekonomik SCAN.
Kjo nuk është hera e parë që ndërmerret një shtyrje e afatit, por ndryshe nga herët e tjera, këtë herë shtyrja është jo 1 vjeçare por 6 mujore. Ky afat përfundon në fakt me një periudhë të ngarkuar të njësive të pushtetit vendor të cilat mund të jenë në një proces të ngarkuar pune për shkak të procesin elektoral për zgjedhjen e kryebashkiakëve dhe anëtarëve të këshillave.
Nga ana tjetër, po zhvillohet edhe një proces ku përdoruesit e tokës bujqësore mund të bëjnë falas dokumentacionin për t’u pajisur me akte pronësie për tokat e përfituara me ligjin 7501.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.