Afati i ri për aplikimet e ish të përndjekurve për kategorinë parësore të dëmshpërblimit, sa persona pritet të përfitojnë?

Në mbledhjen e kësaj jave qeveria ka miratuar vendimin që u jep një mundësi tjetër ish të përndjekurit e kategorisë së parë që nuk kanë plotësuar ende dokumentacionin për dëmshpërblim. Nga vendimi përfitojnë ata ish të përndjekur që nuk kanë arritur të aplikojnë për dëmshpërblim si kategori e parë deri 1 korrik të vitit 2009. Afati i ri i përcaktuar është 31 dhjetori i vitit 2017. Nëse ata nuk i dorëzojnë dokumentet në këtë afat, atëhere do të humbasin të drejtën e përfitimit prioritar.

Pritshmëritë janë që ky shans t’u ofrohet 300 ish të përndjekurve që nuk kanë bërë aplikimin deri në fund të vitit 2009.  Referuar përllogaritjes së bërë nga ministria e Mirëqënies Sociale, numri i përfituesve të kategorisë parësore arrin në 2 mijë, çka nënkupton se rreth 1700 kanë aplikuar tashmë.

Vendimi përcakton se aplikimet për dëmshpërblim të kategorisë prioritare që janë bërë deri me 1 korrik  të vitit 2009 janë të vlefshme. Ndërkohë, pas 31 dhjetorit të këtij viti, ministri i Drejtësisë do të paraqesë para Këshillit të Ministrave dhe Kuvendit raportin me numrin total të kërkesave të paraqitura për dëmshpërblim.

Kategoria e përfituesve parësore

– Prioritetin e parë e kanë ish të dënuarat politike femra, që jetojnë në momentin e dhënies së pagesës dhe hyrjes në fuqi të këtij ligji

– Ish të dënuarit politikë që jetojnë në momentin e dhënies së pagesës dhe që kanë moshën mbi 75 vjeç, në momentin e miratimit të këtij ligji

– Ish të dënuarit politikë të cilët vuajnë sëmundje të rënda

– Ish të dënuarit politikë që jetojnë në momentin e dhënies së pagesës, të cilët pavarësisht moshës kanë pasardhës të radhës së parë, fëmijë, në moshë të mitur në momentin e hyrjes në fuqi të këtij ligji

-Ish të dënuar politikë që nuk jetojnë dhe që kanë trashëgimtarë të radhës së parë, të cilët janë në moshë të mitur në momentin e hyrjes në fuqi të këtij ligji

– Ish të dënuarit politikë që jetojnë në momentin e dhënies së pagesës dhe që kanë moshë edhe nën 75 vjeç, në momentin e miratimit të këtij ligji.

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.