Afron recesioni i radhës në SHBA. Shkak, lufta tregtare. Fed pritet të ulë përsëri interesat

Lufta tregtare me Kinën ka afruar recesionin e radhës në Shtetet e Bashkuara, sipas analistëve të anketuar nga Reuters, të cilët presin që Rezerva Federale të ulë normën bazë të interesit përsëri gjatë Shtatorit.

Pavarësisht pritshmërive për stimuj monetarë,  analistët e anketuar vlerësuan një shans prej 45% që ekonomia e SHBA të zhytet në recesion në dy vitet e ardhshme.

Javën e kaluar, presidenti  Donald Trump tha se do të vendosë tarifa në 10% ndaj 300 miliardë dollarë mallrave kinezë duke nisur nga data 1 Shtator dhe etiketoi kinën si një manipulues të valutës.

Pekini paralajmëroi se kjo lëvizje mund të shkaktojë kaos në tregjet financiarë ndërkombëtarë dhe të parandalojë rimëkëmbjen ekonomike botërore.

Thuajse 70% e ekonomistëve të anketuar bënë të ditur se zhvillimet e fundit kanë afruar recesionin e radhës së SHBA.  Rezerva Federale pritet të ulë normën bazë të interesit në muajin Shtator në 1.75-2%, ndërkohë që treguesi mbi inflacionin nuk po tregon rritje drejt nivelit objektiv.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.