Agim Nesho në ’60 minuta‘: Qeveria e re në Kosovë e sforcuar, Kurti nuk është anti-amerikan
Të ftuar në studion e emisionit politik „60 minuta“ për të folur mbi qeverinë e re në Kosovë ishin diplomati i njohur Agim Nesho dhe gazetari i i Infofokus Zekirja Shabani.
Z.Agim Nesho është shprehur se situata e tanishme është shumë delikate, pasi arsyet për krijimin e qeverisë së re janë shumë artificiale, sikurse për shembull anti-amerikanizmi i Albin Kurtit. “Është e pamundur që marrëdhëniet SHBA- Kosovë të prishen për aq pak muaj sa Kurti ishte në pushtet.”
“Qeveria e re është e sforcuar dhe rrjedhimisht kjo nuk është një gjë e mirë për Kosovën, sidomos lidhur me negociatat me Serbinë”, ka shtuar Z.Nesho. Lidhur me Z.Hotin, diplomati Nesho ka vlerësuar disa arritje të tij dhe figurën teknokrate, por ka nënvizuar sfidën e madhe që kryeministri i ri ka përpara: pandeminë. Lidhur me politikën e jashtme të Kosovës dhe negociatat me Serbinë, Z.Nesho ka thënë se skenari amerikan nuk është më i fortë, sepse presidenti Trump është afër zgjedhjeve dhe politika amerikane nuk e lejon. “Kjo i jep më shumë kohë dhe më shumë mundësi Kosovës për të arritur më shumë negociata.”
Në fund, ka thënë se Kurti ka dal i fortë nga rrëzimi i qeverisë dhe në afatgjatë do të rikthehet akoma dhe më i pushtetshëm në qeverisje.
Z.Shabani është shprehur se Vjosa Osmani mund të largohet nga PDK për shkak se ajo nuk e gjen më veten të përfaqësuar nga ajo parti. “Inati nga të vjetrit e partisë është rritur ndaj Osmanit, ajo shpreh pakënaqësinë e popullatës ndaj kësaj partie, dhe deri tani ka rezultuar e suksesshme.”
Lidhur me kryeministrin e ri, Z.Shabani ka thënë se Z.Hoti më shumë se në karrierën e tij politike njihet si ekonomist, si një ekonomist i mirë dhe i ftohtë. “Më shumë se peshë politike, Z.Hoti mund të thuhet se është teknokrat”. Lidhur me figurën e re të qeveris Hoti, Znj. Haradinaj, në rolin e Ministres së Jashtme, ai ka theksuar se ajo ka qenë afër AAK, nuk ka ndonjë arritje të madhe, e pikërisht këtu është krijuar gjithë zhurma rreth zgjedhjes së saj, për shkak se Kosova, në gjendjen ku është, i duhej një emër i spikatur, i madh dhe i fuqishëm në diplomaci.
I pyetur nga moderatori Hitaj lidhur me prioritetet e qeverisë së re, Z. Shabani ka shprehur se fakti që kjo qeveri i ka dhënë vetes vetëm 2 prioritete krijon dyshime se qeveria e re do ta ketë jetëgjatësinë shumë të shkurtër.
“Buxheti është 2.2 miliard euro, borxhi publik është 17 % e totalit, e kësisoj ne e kemi luksin për të hedhur në treg paketa stimuluese”, është shprehur Z. Shabani lidhur me ekonomikë pandemike të Kosovës.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.