Agjencia Europiane, raport për ujërat e plazheve shqiptare – Cilat janë 12 zonat me cilësi të shkëlqyer dhe 5 zonat që duhet t’i evitoni këtë vit

Agjencia Europiane e Mjedisit ka publikuar të martën një raport ku analizon cilësinë e ujërave për vendet ku do të lahen turistët europianë gjatë këtij sezoni veror. Raporti merr në shqyrtim edhe vendin tonë, ku gjatë sezonit veror 2016 janë matur edhe nivelet e ndotjes në 92 plazhet më të frekuentuara nga pushuesit.

Nga këto 92 pika, 34 prej tyre ofrojnë një cilësi të shkëlqyer të ujit dhe ndodhen kryesisht në Jug të vendit. SCAN ka nxjerë këto zona, bazuar tek harta interaktive e Agjencisë (duke nisur nga skaji më jugor):

• Ksamili, i cili në çdo pikë të matur ofron cilësi të shkëlqyer uji vit pas viti
• Saranda, përveç portit, ku cilësia e ujit ka ardhur në përmirësim
• Borshi
• Qeparoi
• Himara
• Dhërmiu
• Orikumi
• Zonat në jug të Ujit të Ftohtë në Vlorë
• Disa pika në Golem, Kavajë
• Gjiri i Lalëzit
• Laguna e Merxhanit dhe Kënallë, Shëngjin
• Velipoja

Në total janë 61 zona ku uji plotëson kriteret minimale, ndërsa 13 zona kanë një cilësi shumë të keqe uji, ku Agjencia nuk rekomandon të laheni.

Zonat që Agjencia Europiane e Mjedisit kërkon që të evitohen nga turistët janë:

• Grykëderdhja në Sarandë e Lumit Bistrica
• Zona e portit në Sarandë
• Vlora
• Shkëmbi i Kavajës
• Plazhi pranë shëtitoret Taulantia

Për 18 zonat e tjera, raporti vlerëson se nuk ka të dhëna të mjaftueshme, janë plazhe të reja ose plazhe të mbyllura. SCAN ka mësuar se këto zona përfshijnë Fierin, Lagunën e Karavastasë dhe Cekën në qarkun e Lezhës.

Në përgjithësi raporti vlerëson se Shqipëria ka bërë përparime në cilësinë e ujërave, pasi rezultatet e vitit 2015 tregonin se 39,7% e pikave të matura kishin ujë që nuk plotësonte kriteret. Raporti ia atribuon këtë përmirësim të cilësisë së ujit për t’u larë pesë impianteve të reja të trajtimit të ujërave të zeza që janë ndërtuar vitet e fundit. Konkretisht:

1. Impianti i trajtimit të ujërave të zeza në Kavajë – Donacion i Qeverisë Gjermane
2. Impianti i trajtimit të ujërave të zeza në Durrës – Donacion nga Banka Botërore, Luksemburgu, Banka Europiane dhe Komisioni Europian
3. Impianti i trajtimit të ujërave të zeza në Sarandë – Donacion nga BB, Luksemburgu, Banka Europiane dhe KE
4. Impianti i trajtimit të ujërave të zeza në Shëngjin – Donacion nga BB, Luksemburgu, Banka Europiane dhe KE
5. Impianti i trajtimit të ujërave të zeza në Velipojë – Donacion nga Komisioni Europian

“Këto impiante ofrojnë trajtimin e ujërave të zeza për pothuajse gjysmë milioni rezidentë, çka rezulton në ujë shumë më të pastër për t’u larë”, shkruhet në raport.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.