Agjencia Kombëtare e Diasporës, projektligji në Kuvend – Si do të funksionojë, detyrat kryesore dhe burimi i financimit
Këshilli i Ministrave ka dërguar në parlament projektligjin për krijimin e Agjencise Kombëtare të Diasporës, institucionit që do të jetë përgjegjës për bashkëpunimin dhe mbrojtjen e të drejtave të shqiptarë në vendet ku jetojnë.
Agjencia do të jetë nën mbikëqyrjen e ministrit për Diasporën, Pandeli Majko dhe do të ketë një staf prej 15 punonjësish. Financimi i institucionit do t’i kushtojë buxhetit të shtetit një fond total prej 17 milionë lekësh, ku 5 milionë lekë do të shkojnë për ngritjen dhe blerjen e pajisjeve e orendive.
Megjithatë në buxhet nuk janë përfshirë ende fondet për përgjegjësitë specifike të agjencisë, pasi pritet miratimi i saj në Kuvend.
Këto përgjegjësi përfshijnë mbi të gjitha regjistrimin e të gjithë komunitetit shqiptar nëpër botë, në mënyrë që të realizohet në një fazë të mëvonshme edhe e drejta e votës nga aty ku jetojnë.
Një rol tjetër i kësaj agjencie do të jetë edhe bashkëpunimi me organizatat e diasporës, për ruajtjen e vlerave kombëtare e kulturore, si dhe për informimin mbi proceset politike në Shqipëri.
AKD do të jetë një institucion autonom, çka do të thotë se mund të administrojë vetë të ardhurat, shpenzimet dhe asetet. Në krye të këtij institucioni do të qëndrojë Këshilli Drejtues, i përbërë nga 7 anëtarë, që do të funksionojë në mënyrë kolegjiale.
Anëtarët do të jenë përfaqësues nga Ministria e Diasporës; Ministria e Punëve të Jashtme; Ministria e Brendshme; Ministria e Financave dhe Ekonomisë; Ministria e Arsimit, Sportit dhe Rinisë; Ministria e Kulturës; si edhe nga Komisioni Qendror i Zgjedhjeve.
Projektligji thekson se AKD do të përgatisë edhe raporte periodike për Kuvendin dhe Këshillin e Ministrave mbi aktivitetin e diasporës, ndërsa kjo e fundit do të mund të financohet edhe nga donacione e projekte të ndryshme.
Gjithashtu përcaktohet edhe krijimi i Ditës Kombëtare të Diasporës, më datë 18 dhjetor.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.