Agjencitë e kreditit, sytë nga Italia – Salvini: Nuk duhet të paragjykojnë planin e qeverisë
Lideri i Ligës, Matteo Salvini, tha se agjencitë e vlerësimit të kreditit nuk duhet të paragjykojnë Italinë kur të ndërmarrin vlerësimin e borxhit të vendit. Zv/Kryeministri përjashtoi gjithashtu mundësinë e daljes së vendit nga Eurozona.
Moody’s, që ka një perspektivë negative për Italinë dhe një vlerësim prej Baa2, ka pritur që Roma të lajmërojë planet fiskale dhe ka bërë të ditur se do të bëjë gjykimin në fund të muajit Tetor.
Standard & Poors, që e vlerëson borxhin italian në “BBB” me perspektivë të qëndrueshme, pritet të rishikojë vlerësimin më datë 26 Tetor.
“Shpresoj që askush të ketë paragjykime për këtë Qeveri”, tha Salvini. Ai shtoi se vlerësimet e agjencive nuk duhet të përdoren për të detyruar shitjen e kompanive të çmuara si firmat e energjisë ENI dhe ENEL që kontrollohen nga Shteti, kompania e sigurimeve Generali dhe zyra kombëtare e postës, Poste Italiane.
“Fëmijët e mijë do të rriten në Europë me euro nëpër xhepa. Dalja nga Eurozona nuk është në Axhendë”, tha Salvini.
Plani i buxhetit në Itali që u publikua të Enjten e kaluar, mund të bëjë “rikoshetë” për qeverinë populiste, ndërkohë që analistët kanë paralajmëruar për rritjen e kostove të huamarrjes, gjë që nis betejën me Brukselin dhe agjencitë e vlerësimit.
Komisioni Europian, në një letër drejt Italisë, tha se është shqetësuar për planin e deficitit për 3 vitet e ardhshme. Megjithatë, Roma zyrtare ka këmbëngulur se nuk do të tërhiqet nga planet e shpenzimeve.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.