Agjentë në jetimore – Manastirliu: Masa për sigurinë dhe ri-integrimin e fëmijëve të braktisur
Nis plani operacional një vjeçar në funksion të mirërritjes së fëmijëve jashtë kujdesit prindëror. Kjo është një nismë e marrë nga Ministria e Shëndetësisë e cila ka në fokus që të evidentojë të gjitha nevojat që kanë familjet biologjike për të mundësuar ri-integrimin e tyre. Mbi 80% e fëmijëve që trajtohen në institucionet e përkujdesit kanë familje me probleme social-ekonomike.
Ministria e Shëndetësisë në kuadër të sigurisë së fëmijëve në këto institucione do të përgatisë punonjës të ISHP si agjentë. Do të jenë këta të fundit që do të informojnë në kohë reale për sjelljet e palejuara brenda institucionit.
Më tej projekti synon që të krijojë edhe pavarësinë e fëmijëve të rritur larg familjeve biologjike duke ju mundësuar bursa për arsimin profesional sipas kërkesave të tregut të punës. Aktualisht në vendin tonë janë 230 fëmijë të cilët marrin përkujdes shoqëror në 9 institucione.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.