Ahmetaj: 220 mijë vende të reja pune hapen deri në fund të mandatit të dytë. Sa do të rriten pagat dhe pensionet?
Gjatë takimit me sipërmarrësit, ish-ministri i Financave Arben Ahmetaj foli edhe për numrin e vendeve të punës që pritet të hapen gjatë mandatit të dytë, si dhe për rritjen e pagave dhe pensioneve.
Konkretisht, Ahmetaj pohoi se do të hapen 220 mijë vende të reja pune deri në fund të mandatit të dytë, pagat për mjekët dhe mësuesit pritet të rriten me 30-40 për qind, ndërsa pensionet pritet të rriten nga 7-10 mijë lekë deri në fund të vitit, si pasojë e paketës së solidaritetit.
“Do të hapim 220 mijë vende të reja pune, në fund të mandatit të dytë, këto i kemi përllogaritur më së miri. Ashtu siç këmbëngulëm për reformën në drejtësi, do të bëjmë të pamundurën për reformat ekonomike dhe realizimin e punësimit. Pensionet do te rriten nëpërmjet paketës së solidaritetit nga 7-10 mijë leke në fund të vitit. Platforma jonë do të realizohet duke ulur nivelin e borxhit publik. Do të rrisim pagat nga 30 deri në 40 për qind për mjekët dhe mësuesit”, tha Ahmetaj.
Deklaratat e Ahmetajt u bënë gjatë një takimi mëngjesin e sotëm me sipërmarrësit, ku u shpalosën para tyre sfidat e një viti elektoral e me tej, për ekonominë dhe klimën e të bërit biznes.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.