Ahmetaj në Rrogozhinë: Kashar-Rrogozhinë transformon zonën – Mbështetja në bujqësi, përfituan 92% e fermerëve që aplikuan

Ndalesa e radhës e Turit të llogaridhënies publike ishte në Rrogozhinë, ku Ministri i Financave dhe Ekonomisë, Arben Ahmetaj ka zhvilluar takime me banorët e zonës.

Sipas ministrit, në dy vitet e fundit zona ka marrë investime të konsiderueshme dhe do të vazhdojë të marrë, veçanërisht falë aksit Kashar-Rrogozhinë.

“Rrogozhina do të përfitojë nga projekti i madh infrastrukturor që është Kashar-Rrogozhinë. Besoj në krye të tre- katër viteve, zona do të jetë krejtësisht ndryshe, sepse Tiranë-Rrogozhinë do të jetë për 15-20 minuta, Rrogozhinë-plazh nëpërmjet Vilë Bashtovës, apo edhe hyrjes në anën tjetër, do të jetë maksimumi 15-20 minuta. Pra, do të jemi nyje shumë e rëndësishme në trafikun e Shqipërisë, por edhe në trafikun komercial të Shqipërisë, por edhe në zhvillimin ekonomik të Shqipërisë dhe të turizmit”, tha Ministri.

Ahmetaj u ndal edhe tek skema e sivjetshme e mbështetjes për bujqësinë, ku kanë përfituar nga fondet e shtetit 127 fermerë nga bashkitë Rrogozhinë e Kavajë.

“Kur erdhëm para dy muaj e gjysmë folëm për investimet dhe mbështetjen në bujqësi dhe janë gati pak më pak se 60 fermerë në gjithë bashkinë e Rrogozhinës që kanë dalë fitues në raundin e parë për mbështetje nga AZHBR, pra subvencion nga shteti. Dhe në të gjithë zonën e Kavajë-Rrogozhinës janë gati 127 fermerë që kanë fituar të drejtën për mbështetje. Besoj që është shumë e rëndësishme edhe për punësimin, edhe për ekonominë. Nuk ka ndodhur ndonjëherë që në zonën e Rrogozhinës të ketë mbështetje që 60 fermerë të marrin subvencione. Në Kavajë maksimumi 8 veta në vitet e kaluara, deri në 10 veta. Këtë vit 92% e aplikantëve kanë fituar të drejtën për të marrë subvencion, që do të thotë se do të duhet ta shfrytëzojmë për të ndihmuar qytetarët të zgjerohen, të vetëpunësohen, pse jo, një ditë të marrin dhe në punë, dhe mbi të gjitha të kenë mundësi të futen dhe në zinxhirin e prodhimit dhe në zinxhirin e eksportit”, tha Ahmetaj.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.