Ahmetaj takim me sipërmarrësit: Rritja ekonomike në fund të mandatit të dytë 6%. Ja sa do të ulet taksa progresive
Ish-ministri i Financave Arben Ahmetaj zhvilloi mëngjesin e sotëm një takim me sipërmarrësit, ku ka shpalosur para tyre sfidat e një viti elektoral e me tej për ekonominë dhe klimën e të bërit biznes. Gjithashtu, Ahmetaj ka prezantuar platformën në favor të sipërmarrjes në katër vitet e ardhshme, si dhe bëri një përmbledhje të situatës ekonomike dhe financiare të vendit për vitet 2013-2017, ku prezantoi edhe një herë reformat e ndërmarra.
“Ekonomia që trashëguam ishte në nivel të ulet, por ne e rilindëm me sakrifica, bashkë me biznesin. Mbajtëm premtimet për reformat ekonomike, sidomos me ndërmarrjen e fundit, ku ulëm TVSH për turizmin. Ne kemi hartuar tashmë programin ekonomik për 4 vitet e ardhshme dhe do të ofrojmë një pakete realiste, të zbatueshme dhe konkrete. Kam dorëzuar një buxhet me suficit, 110 milionë dollarë tek Ministria Teknike. Oferta jonë ka të balancuar ofertën mes qytetarit dhe sipërmarrjes, ndërsa oferta e opozitës është për të qeshur”, tha Ahmetaj.
Gjithashtu ish-ministri i Financave u ndal gjatë këtij bashkëbisedimi edhe në rritjen ekonomike deri në fund të mandatit të dytë, si dhe uljen e taksës progresive dhe uljen e dividentit.
“Kalkulimet e bëra janë që në fund të mandatit të kemi rritje ekonomike deri në 6 për qind. Do të ulim taksën progresive nga 23 në 18 për qind, do ulim tatim – fitimin për kompanitë e software në 5 për qind. Gjithashtu do të ulim dividentin në 6 për qind nga 15 për qind që është aktualisht”, tha Ahmetaj.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.