“Air Albania”, Turkish Airlines konfirmon ortakërinë për investitorët – Ja sa do të jetë kapitali

Pas vendimit të qeverisë shqiptare për miratimin e marrëveshjes së ortakëve për statusin e shoqërisë “Air Albania”, kompania turke “Turkish Airlines” ka konfirmuar partneritetin edhe për investitorët e saj.

Nëpërmjet një njoftimi publik ditën e mërkurë, korporata konfirmon se do të krijojë sipërmarrjen e përbashkët që do të operojë në fushën e transportit të pasagjerëve dhe të mallrave.

Marrëveshja e botuar edhe në Fletoren Zyrtare tregon se kapitali fillestar do të jetë 100 mijë lekë, ndarë në 49% për Turkish Airlines, 41% për MDN Investment dhe 10% për Albcontrol, e cila përfaqëson këtu shtetin shqiptar.

Megjithatë, Turkish Airlines zbulon në dokumentet për Bursën e Stambollit se pritet të ketë një rritje kapitali deri në 30 milionë dollarë, raporton portali ekonomik SCAN.

Pas këtyre informacioneve, kompania e mbylli ditën në rritje me 0.28%, me një listim në kuotën e 18 lirave turke, niveli më i lartë që prej muajit Maj 2018.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.