Akset rrugore në jug – Gati kontrata e mirëmbajtjes 13.7 mln euro, ku do ndërhyhet

Autoriteti Rrugor Shqiptar ka publikuar Planin e Menaxhimit Social dhe Mjedisor për akset rrugore në rajonin jugor Vlorë-Gjirokastër, e cila në total kap vlerën e 13.7 milion euro, financuar nga Banka Botërore.

Ajo përfshin të gjitha punët fizike, aktivitetet dhe shërbimet e nevojshme për t’i sjellë rrugët në nivelin e shërbimit të kërkuar dhe për t’i mirëmbajtur e menaxhuar përgjatë gjithë kohëzgjatjes 5-vjeçare të kontratës.

Në total janë 8 akse ku parashikohet të ndërhyhet në tre kategori kryesore. Më konkretisht, do të ndërhyhet në punime rehabilitimi ku futet pjesa e asfaltimit, muret mbajtëse si dhe sinjalistika e nevojshme.

Gjithashtu, parashikohen shërbime të performancës së rrjetit rrugor, të cilat konsistojnë në punime dhe shërbime të mirëmbajtjes rutinë si dhe në punime të emergjencës që kanë të bëjnë me aktivitetet e nevojshme për rivendosjen e rrugëve dhe rehabilitimin e strukturës së dëmtuar si pasojë e ndonjë fenomeni natyror.

Ndërkaq, kontrata nxjerr në pah situatën aktuale të këtyre akseve rrugore, sipas të cilës ato nuk janë në kushte shumë të mira dhe jo në standardin e kërkuar.

”Disa akse rrugore janë rikonstruktuar së fundmi por shfaqin disa probleme si mungesë të sinjalistikës vertikale dhe horizontale, ndriçim jo të mjaftueshëm, etj. Në këto kushte rritet risku për aksidente”,-thuhet ndër të tjera në dokument.

AKSET RRUGORE KU DO TË NDËRHYHET

Mallakastër – Kakavijë 82.9 km

Fier – Kufi Tepelenë 57.71 km

Tepelenë – Vlorë 0.34 km

Pusi i Mesinit – Sarandë 121.80 km

Levan – Vlorë 24.61 km e gjatë

Shkozet – Plepa 8,3 km

Ura e Kranesë – Konispol 33 km

Sarandë – K/Qafë Muzinë 22 km.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.