Aksion për 25 mijë pemë të reja – Veliaj, administratorëve: Çdo biznes të mbjellë një pemë

Rreth 25 mijë pemë të reja do t’i shtohen kryeqytetit deri më 21 Mars. Kryetari i Bashkisë, Erion Veliaj ka mbledhur 24 administratorët e njësive bashkiake për aksionin e mbjelljes së pemëve, ku u kërkoi të kontaktojnë çdo biznes në kryeqytet dhe t’u kërkojnë mbjelljen e një peme në ambientet e tyre. Ndërkohë që një apel për përfshirje në këtë aksion është bërë dhe qytetarët.

“Dua shumë që në njësitë Administrative të merret një kontakt me të gjithë njerëzit që janë në ndihmë ekonomike. Unë besoj që në aksione të tilla e kemi të gjithë të drejtën që këtyre njerëzve, që në Tiranë janë mbi 5 mijë, t’u themi një ditë punë duam për gjithë këto para që merren. Mund të përkthehet në një punë në komunitet. Unë besoj që të paktën të 5 mijë, përveç të gjithë ne që jemi organizuar dhe e kemi nga dëshira, por edhe të gjithë ata që i marrin këto para nga bujaria e qytetarëve të Tiranës mund të na japin një dorë në fushatën e mbjelljeve. Kështu që ju lutem në kontakt të gjithë njerëzit që marrin një asistencë dhe marrin një çek nga Bashkia e Tiranës që mund ti japin komunitetit një ditë punë. Një ndër gjërat që kemi kërkuar është që të gjithë qytetarët e Tiranës të na bashkohen në fushatën e 21 marsit. Sot, ne kemi një faqe: aprtirana.al, ku ne bëjmë një numërim ditor të pemëve të mbjellë dhe ne sapo kemi kaluar kufirin e 75 mijë pemëve, pra jemi vetëm 25 mijë pemë larg nga rekordi ynë i 100 mijë pemëve për këtë sezon dhe besoj që në qoftë se për ditët që na kanë mbetur vazhdojmë me këtë ritëm, siç e nisëm sot me rreth 400-500 pemë në ditë, jam i bindur se jo vetëm do ta kapim këtë rekord, por edhe do e kalojmë”, tha kryebashkiaku

80 pallate në kryeqytet kanë marrë përsipër që të mbjellin secili 5 pemë. Veliaj shfrytëzoi rastin për t’u bërë edhe njëherë apel qytetarëve që të zgjedhin asamblenë , ndërkohë që bëri e dije se deri në fund të vitit do jetë mbyllur plotësisht procesi i zgjedhjes së administratorëve.

“Tani që i kemi vënë në vijë do të doja që ne të vazhdonim edhe me pallatet e fundit që na kanë mbetur pa mbledhur asambletë. Më rezulton se ne kemi mbledhur deri më sot 2790 asamble , do të thotë 2790 komunitete, edhe besoj se ky duhet të jetë viti i fundit ku ne do të pajisim çdo pallat me administrator dhe do ta kthejmë Bashkinë e Tiranës në një bashki model. Dua të ftoj të gjithë qytetarët, të atyre pak pallateve që kanë mbetur, që të gjejnë kohën e tyre”, tha Veliaj.

Aktualisht në kryeqytet janë mbjellë 75 mijë pemë, dhe ambicia është që deri në fund të sezonit, që përkon me 21 Marsin, Ditën Ndërkombëtare të Pyjeve, të arrihet në një numër total prej 100 mijë pemë.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.