Aksioni për ujin në Tiranë – 5 mijë aplikime për kontrata të reja
Bashkia e Tiranës prej një jave i është bashkuar aksionit agresiv në sektorin e ujit, duke targetuar kryesisht bizneset.
Në terren janë 15 grupe të Ujësjellës-Kanalizime Tiranë të cilat po bëjnë verifikimet dhe subjektet që kapen në shkelje do të përballen me ligjin.
Në një intervistë për TV SCAN, Drejtori i Departamentit të Shitjeve në UKT, Elvin Tivari, bën me dije se deri më tani janë bërë 5 mijë aplikime për kontrata të reja.
“Janë shumë biznese, të cilat janë përballur, kanë ardhur pranë sporteleve tona. Sigurisht pjesa më e madhe ka qenë për kontrata të reja. Janë rreth pesë mijë aplikime për kontrata të reja pranë sporteleve tona. Kapaciteti jonë është më i vogël, dhe ne po ecim me 2500 kontrata në muaj për ti bërë aktive. Kjo nuk i penalizon qytetarët, sepse në momentin që janë deklaruar pranë pikave tona UKT, është marrë aplikimi dhe është thjesht çështje procedure deri në vendosjen e matësit dhe fillimin e kontratës ligjore.”
Problematike në këtë drejtim kanë qenë edhe institucione publike të cilat janë ndërgjegjësuar dhe kanë shkuar pranë UKT për të paguar detyrimet e prapambetura.
Ndërsa për qytetarët, aksioni do të nisë në muajin Mars dhe do të zgjasë deri në fund të vitit.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.