Aksioni për ujin në Tiranë – Verifikohen 12 mijë konsumatorë, shoqërohen 40 abuzues

Shoqëria Ujësjellës-Kanalizime Tiranë po vijon më intensitet aksionin në sektorin e ujit të pijshëm në Tiranë, i cili ka nisur nga data 1 Shkurt për bizneset dhe 1 Mars për familjarët. Grupet e UKT po kryejnë verifikime derë më derë jo vetëm tek bizneset por edhe tek konsumatorët familjarë, për të mos lejuar asnjë lidhje të paligjshme si dhe për të disiplinuar çdo debitor, duke i mundësuar përfshirjen në skemat lehtësuese të shlyerjes së debisë.

Sipas të dhënave nga UKT,  deri më tani, vetëm në kryeqytet janë shoqëruar në komisariat rreth 40 abuzues, të cilët janë konstatuar me lidhje të paligjshme apo që kanë ndërhyrë qëllimisht në ujëmatës duke prishur rrjedhimisht vulën e sigurisë. Ujësjellës-Kanalizime Tiranë bën me dije se numri i verifikimeve i ka kaluar 12 mijë dhe të gjithë këta konsumatorë kanë qenë subjekt kontrolli të imtësishëm.

UKT lajmëron gjithashtu se aksioni nuk do të ndalojë deri në futjen në ligjshmëri të plotë të këtij sektori. Në terren janë 15 grupe të Ujësjellës-Kanalizime Tiranë të cilat në bashkëpunim edhe me Policinë Bashkiake po bëjnë verifikimet përkatëse.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.