Akti/ Qiratë e tërmetit kushtojnë 1 miliardë lekë në vit. Përfituese 6 mijë familje
Subvencioni i qirave për 1 vit për familjet e prekura nga tërmeti vlerësohet se do të jetë një kosto 1 miliardë lekë.
Janë rreth 6 mijë familje të cilat do të përfitojnë subvencionin që mbulohet kryesisht nga buxheti i shtetit.
Shifra bëhet e ditur në aktin normativ të miratuar nga qeveria për në kuadër të gjendjes së fatkeqësisë natyrore të shpallur në Tiranë, Durrës dhe Lezhë dhe që synon përshpejtimin e procedurave të subvencionit për familjet e prekura.
Miratimi i këtij akti normativ është diktuar në kuadër të masave që po merr qeveria për t’u ardhur në ndihmë të familjeve, banesat e të cilave, si rezultat I tërmetit të datës 26.11.2019, janë shembur ose janë deklaruara si të pabanueshme me akt konstatimi nga Instituti i Ndërtimit.
Subvencionimi i qirasë konsiderohet një instrument financiar që i jep zgjidhje të shpejtë situatës së strehimit të familjeve që kanë ngelur të pastreha si rezultat i fatkeqësisë natyrore.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.