Aktiviteti i bizneseve në Eurozonë – Pritet ta mbyllin vitin në optimizëm, nuk cënohen nga politika
Ekonomia e Eurozonës është fuqizuar me ritmin më të shpejtë në mbi 6 vite gjatë Nëntorit, duke e përfunduar me optimizëm këtë vit, ku ka patur shumë trazira politike.
Indeksi PMI, që bazohet në sondazhet drejt bizneseve private dhe që shihet si një tregues i saktë mbi rritjen ekonomike, u rrit në 57.5 pikë, që është nivel rekord i lartë.
Sipas analistëve, biznesi në Eurozonë nuk është ndikuar nga pasiguritë politike në shumë vende, kryesisht Gjermani dhe Spanjë.
Bazuar në rritjen e porosive ndaj bizneseve dhe punësimit si dhe optimizmit të tyre, Eurozona do ta nisë vitin që vjen në performancë të fortë.
Vështirësitë e kancelares gjermane Angela Merkel në formimin e qeverisë dhe vota e Katalonjës për t’u ndarë nga Spanja, nuk kanë lënë gjurmë të mëdha në ekonominë e
Eurozonës deri më tani, që pritet të tregojë performancën më të mirë vjetore në një dekadë.
Mbështetur nga stimujt monetar të Bankës Qendrore Europiane, blloku ndodhet në rritjen ekonomike më të sinkronizuar që prej krijimit të valutës së përbashkët, ndërkohë që optimizmi është përhapur në të gjitha vendet e rajonit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.