Aktiviteti në Gjinar, Presidenti Meta kërkon rritje të mbështetjes për gratë në zonat rurale

Presidenti i Republikës Ilir Meta ishte të hënën i pranishëm në një aktivitet të zhvilluar në Gjinar të Elbasanit kushtuar grave dhe vajzave në zonat rurale. Veprimtaria e organizuar nga “United Nations Women Shqipëri” u zhvillua në kuadër të 8 Marsit, Ditës Ndërkombëtare të Gruas.

Meta u takua me një numër grash dhe vajzash të zonave rurale, të cilat ua kanë kushtuar veprimtaritë e tyre prodhimit të mjaltit, kultivimit, mbledhjes dhe përpunimit të bimëve mjekësore, etj.

Në fjalimin e mbajtur në këtë aktivitet, Presidenti kërkoi më shumë mbështetje për këtë kategori.

“Të gjithë jemi të ndërgjegjshëm se sa më shumë e mbështesim turizmin, sa më shumë të mbështesim bujqësinë, sa më shumë të mbështesim agro-biznesin, aq më shumë ndihmojmë gratë në këto zona dhe në të gjithë Shqipërinë, ndihmojmë luftën kundër varfërisë dhe bëjmë të mundur që nga rritja ekonomike e vendit të përfitojnë gjithnjë e më shumë njerëz. Mendoj që kjo është vendimtare edhe për një shoqëri më të drejtë, edhe për një ekonomi më të shëndetshme, por sidomos edhe për të luftuar varfërinë”, tha Meta.

Duke adresuar problematikat që prekin gratë në këtë zona, si varfëria, informaliteti dhe puna e papaguar, Meta u shpreh se nevojitet një akses më i madh në arsimin dhe kualifikimet profesionale. Për këtë arsye, sipas tij, strategjitë e zhvillimit rural duhet të synojnë rritjen e të ardhurave për familjet për rritjen e prodhimit bujqësor, me qëllim reduktimin e varfërisë.

“Duhet të kemi në konsideratë këto strategji gjithashtu, shumëfishimin e skemave të granteve dhe subvencioneve dhe indiskriminimin sa më pozitiv sidomos kur bëhet fjala për sipërmarrje të grave dhe vajzave. Promovimi i skemave të mikrofinancës së kredive agrare me interesa të buta për sipërmarrjet e vogla dhe të mesme të grave dhe vajzave në zonat rurale do të ishin një kontribut i çmuar për gjallërimin e ekonomive të këtyre zonave. Njëkohësisht përmirësimi i kapaciteteve institucionale të administratës qendrore dhe vendore në orientimin e sektorëve prioritarë për përfitimin e vendeve të punës në këto zona mbetet mjaft kyç”, shtoi Meta.

Në përfundim të fjalës së Tij Presidenti Meta shprehu kënaqësinë që u rikthye në këtë zonë me mjaft tradita dhe i uroi suksese komunitetit, si dhe në veçanti të gjithë grave dhe vajzave që kanë thurur këto vepra kaq të bukura dhe që kanë gatuar edhe këto produkte të mrekullueshme.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.